Ravrava nin Jud 1 - Hano Niu Testamen

Avoanan Tabeana

¹ Nin Jud atatun rovoga non Jisas Kraes i tuan Semes. Lalai atatu duluai be God nu Uloinira. God Tata nu tabe kimiu, i kimiu gin rahu lol Jisas Kraes:

² Sine hagavi, tamwata i lolotabetabe vi vora nomiu roso.

Avoan Dau huri ira Vagahi Tentene

³ Ira tuaku, nam doron maragai be nav ravae lalai kimiu huri varahuva be tam dogo alolona lol God. Take nav ravae i nav hudali kimiu be giv bwalo mwasigi huri binihimwasigi garagusi be God nu laia lalai non atatu.

⁴ Atatu len̄len̄aga rituai ran haroro dahuligi vai lol nom tatan̄ana, kera ran avo vai alun God i ran leahi silo vagahin hogoi non nonda God be ram lol dum ginau hahantai, ram barihai didi lai Jisas Kraes vai alolora, nonda Ratahigi i God. Take tuai avoan sabuga mwa bevea be atat len̄len̄aga keragea rav lai silo vevegi.

⁵ Nam doronbe nav vasinerani kimiu gin ginau rituai be gim iloe huba: Giv vinihi dumwia be Ratahigi nu varahu non sinombu be nu lai luara nin ute Ijip, take ataguna nu lol kaburainira be ran hav binihi te mwasigi.

⁶ I giv vinihi dum ira enjel be ran hav tu te wasigi lol tanora huri muramura i ran lin̄ mwasin tanora. Ratahigi mwa dau ira enjel geki lol ute meto, mwa bauhira gin gao talai be mosmosianana nu sigai, huribe vi vevegira la gubwen̄ vevegi.

⁷ Mulei giv vinihi dum ira bwatutun Vanua Sodom i Komora i ira bwatutun vanua dodolua dalisira, ira atatuna ran lolia kun ira enjel kerageki be ram lol alen̄ hahantai lol davolan vavine i atamwani: vevegin gabi be ran van sivinia mwa bora malele lalai gida duluai be tav gitae.

⁸ Atatu be nam bevera ram lol ginau kun atatu be ram ḡita maturubore i mwa lolira sibora ram masiri gin vuro. Ram hav doron te didi ron̄ ira lavoa ḡoro non God i ram avo vai alun ira enjel.

⁹ Len̄len̄a be muai enjel Maikol, lol taro be mwa bigaigai mai atmate be ihei vi lai rebehin Moses, i mwa harae be atmate nu vahala. Ninia gea, mwa bevea be, “God vi vevegigo!”

¹⁰ Take atatu kerageki ram avo la ginau be ram hav iloe tehe. I ginau be ram iloe, gin nora ron̄ova, kun ginau rahu buhiga be ram ilo ginau, kea haḡea ginau be mwa lol bwarebwarera.

¹¹ Vi hantai maragai hurira. Ran huri hala non Ken, i ran lol ginau vahala kun Balam huri homu. Ram bwalo vai alun God kun Kora be nu lolia, i vi lol kaburainira kun Kora.

¹² Ram bora kun ginau bibili lol ginaganian sabuga be gim hogohogo alolona. Ram ḡan ginau maigo i ram hav matagu tehe, ram binihira sibora. Ran kun dodo be uhe sigai, be lan̄i mwa here dodorainia. Ram bora kun gai ata lol taron rara be ram mauri nin tano take vwaira sigai, i ram mate vairuruai.

¹³ Ram bora kun navo turu ata lol tahi, be ram domare la lalan̄an rerena mahaḡea. Ram bora kun visiu be mwa lago daltaligi lol mahao be gubwen̄ vwate God vi taua lol ute meton mateana be mwa du vatuvwai hurira vai tuai.

¹⁴ Enok, gaibitun vara ata la Adam, mwa bevea huri atatu kerageki be: “Gitae, Ratahigi mwa mai, mai non ira enjel vasan̄vul vavasi be

¹⁵ men vevegi atatu n̄oto be ram hav doron te God huri ginau hantai duluai be ran lolia vai aluna. I vi lol ḡagaras ira atat vuroga be ram buroga vai alun God i huri ginau hantai duluai be ram bevea vai aluna.”

¹⁶ Atatu kerageki ram av wasi i ram dultuli mai vai la kera dodolua, ram lol ginau vahala be ram doron be rav lolia. Ram av ravravwega hurira sibora, i ram lol alen̄ wasi maia atat dodolua be ramen lol hano be ram doronia.

Avoan Wasi i Ginau be vi Loliana

¹⁷ Ira tuaku, giv vinihi dum avoan wasi be ira hala non nonda Ratahigi Jisas Kraes ran vevea amua.

¹⁸ Ran vevea lalainigo be, “La nogonan taro, vi vora atatu be ram manuhi God, ram huri nora doroniva sibora be nu vahala la silo non God.”

¹⁹ Kera haḡea atatu be ram hara bora kimiu, atatu be binihira huri ureure n̄an geki, be Vui Sabuga sigai maira.

²⁰ Ira mwasin tuaku, giv haḡo mwasin nomiu binihimwasigi garagusi be vi lol domarei kimiu, giv tataro lol Vui Sabuga.

²¹ Giv togo lol lolotabetabe non God, lol taro be gom hohovi huri sine hagavi non Ratahigi Jisas Kraes mai non Vui be vi lai rahuana lalainigo vai tuai.

²² Giv lol seserai sine hagavi lalai atatu rituai be binihira ram lalan̄aga;

²³ giv lai lua kera rituai nin gabi, ba barahura. Giv seserai hagavi mai mataguana lalai kera dodolua, giv varihai gaisagan atatu be nu masiri gin alen̄an binihiv sage.

Nogonan Tataro

²⁴ Lalainigo be vi gitaḡorogo be gosav hovi tehe i vi lai lalainigo rahuan melmelo be vahalana sigai mai samwarana lol non sarisari,

²⁵ lalai God gaituvwa nonda varahuva, la ihan Jisas Kraes nonda Ratahigi, lalainia samwarana, sarisari, muramura, i mwasigi huri taro be nu nogo, kadogaha i vai tuai. Amen.