Leo Tavuha gabe Mak nu Ravae 12 - Hano Niu Testamen

Avoan Dalogai huri ira Gitaḡoro Lol Talun Taligaon Waen

¹ Haḡe Jisas mwa avo lalainira gin avoan dalogai be: “Atatu vwate kea nu riv taligaon waen, mwa haḡo ara dalisia i mwa ḡel lulun mwasin vwain taligao be vi varahian momogai alolona. I kea mwa lol imwa holomare vwate huri matmatai ḡoro. Haḡe vuigin talu mwa mahin̄ai talu lalai ira gitaḡoro rituai be rav lol rovoga alolona. Vuigin talu mwa derai vanuana i mwa ban dagai hautu.

² Mahavana mwa mai be men harana na vwain gaon taligaon waen, kea mwa hora turin rovoga vwate abera ira gitaḡoro huri be rav bete uduna gabe nona lalainia.

³ Ira gitaḡoro ram haḡo batugehi turin rovoga, ram wehia i ram hora muleinia vuroi.

⁴ Haḡe vuigin talu mwa hora turin rovoga vwate mulei, i ira gitaḡoro ram wehia la bwatuna i ram lol busbusi maragainia.

⁵ Vuigin talu mwa hora mulei turin rovoga vwate, kera ram wehi bamatea i ram lolira ivusi mulei kunia, ram wehira i ram wehi bamat rituai.

⁶ Gaituvwa mwa dogo radu be vi horana gabe nitun vuigin talu gabe mwa dabe maragainia. La nogonana, kea mwa hora mwasin nituna vai aben ira gitaḡoro talu, mwa bevea be, ‘Nam iloe be rav gita dabe nituku.’

⁷ Ta ira gitaḡoro ram avo mau ginira be, ‘Geki haḡea nitun vuigin talu. Gin mai ba tan wehia, i taluna vi vora taluda!’

⁸ Haḡe ram haḡo batugehi nituna ram wehi bamatea i ram bohai lua rebehina vai avare dagai nin talun waen.”

⁹ Jisas mwa hudaligi be, “Vuigin talu vi lol hano lalainira? Kea vi mai vi wehi bamatera duluai i vi hagai talun waen lalai ira gitaḡoro dodolua.

¹⁰ Nam iloe be gin vasogoe huba lol ravrava sabuga mwa bevea be, ‘Gaimahan̄an imwa gabe kera ran vohai kaburainia kadogaha mwa bora mwasin gain imwa.

¹¹ Ginau gea Ratahigi Sibona nu lolia; ginau dan̄an̄a la lolmatamai!’ ”

¹² Ira tomuai ḡoro Jius ram lol ron̄oe be rav haḡo batugehi Jisas, bwatuna ram iloe be mwa bev avoan dalogai uhu hurira. Take ram matagui sinombu, ta sigai ram bisdagai ninia.

Avoan Hudaligi huri Harahara Takis

¹³ Haḡe ira tomuai ram hora ira Varise maira ata lol vatugigi non Herod vai aben Jisas ram hiḡe hala be rav san haninia gin avoan hudaligi.

¹⁴ Ram mai abena ram bevea be, “Vagahi, gam iloe be giḡo atat mwasigi, gom bagahi mwasigi sinombu huri hala gabe God mwa doronia i gom hav matagui te atatu gaituvwa. Son̄o be atatu gaivua sa naturigi. Gov vevea lalai kamai, gom binihi haninia? Nu vahala hurin nonda silo be tai vol takis lalai Ratahigi lavoa ata Rom sa sigai?”

¹⁵ Take Jisas mwa ilo nora binihiv hantai mwa bevea be, “Huri hano gim lol ron̄oe be gimen ruruhiau? Gin lai vatlegiga ba nan gitae.”

¹⁶ Kunia ram lai homu vwate lalainia i kea mwa hudaligi be, “Nunun hei i ihan hei alun homu uhu?” Haḡe ram bwaliua be, “Nunun Ratahigi lavoa ata Rom.”

¹⁷ Haḡe Jisas mwa bwaliura be, “Giv lai lalai Ratahigi ginau non Ratahigi i lalai God ginau non God.” Mahavana ram ron̄oe kunia kera ram dan̄an̄a maragai gin Jisas.

Avoan Hudaligi huri Tomarean Mulei nin Mateana

¹⁸ Haḡe ira Sadusi rituai ram mai aben Jisas. (Kera haḡea uhu gabe ram bevea be atatu sihav tomare te mulei nin mateana.)

¹⁹ I ram hudaligi be, “Vagahi, Moses nu ravae lol non silo vagahi be: ‘Be atatu mwa lagi vavine vwate nituna sigai radu i mwa mate, kunia mwa du be tuana vi lai bwerona huri be raru vi bav atatu huri tuana be nu mate.’

²⁰ Mahavan vwate ira huhu gaituvwa gaibitu; tuagai nu lagi, vuvuri mwa mate nituna sigai.

²¹ Gairuana mwa lagi vavine gea mwa mate nitura sigai. Kunia mulei mwa loli lalai gaitoluna,

²² kera gaibitu ran lagi vavine uhu ram mate duluai nitura sigai. Nogonana vavine mwa mate.

²³ Lol, mahavana gabe atat mate rav tomare vai lol rahuana batena gubwen̄ tomare, vi vora tasalan ihei ninira? Bwatuna kera gaibitu duluai ran lagi maia.”

²⁴ Take Jisas mwa bwaliura be, “Gim bahala maragai! Gim iloe bwatuna hano? Geki bwatuna be gim hav ilo te ravrava sabuga i muramura non God.

²⁵ Batena be kera be ran mate rav tomare mulei, kera rai vora kun ira enjel lol ute atamare, i rasav lagi tehe.

²⁶ Huri tomarean mulei nin mateana: kimiu gim hav vasogo te buk non Moses huri gabi nu oda ute vono? Nu ravana alolona be, God nu vevea lalai Moses be, ‘Inau God non Ebraham, God non Aisak, i God non Jekob.’

²⁷ Take God gea nora God gabe ram rahu, mwa hav vora te nora God gabe ran mate. Kimiu gim bahala maragai!”

Muan Leo Horai

²⁸ Vagahin Silo vwate aia be nu ron̄ vevuriana. Mwa ḡitae be Jisas nu vwaliu tavuhai nora avoan hudaligi, i kea mwa mai vai aben Jisas mai avoan hudaligi mwa bevea be, “Leo horai behe gabe mwa bora muana alolora duluai?”

²⁹ Haḡe Jisas mwa bwaliua mwa bevea be, “Geki haḡea muana, ‘Israel, gov roron̄tai! Ratahigi gabe nonda God kea gaituvwa n̄an nonda Ratahigi.

³⁰ Gov lolotabetabe nom Ratahigi gabe God gin lolomwa duluai, gin atmatemwa duluai, gin binihimwa duluai, i gin nom muramura duluai.’

³¹ Gairuan leo horai marahi geki be: ‘Giv lolotabetabe irahei duluai kun kimiu sibomiu.’ Leo horai sigai mulei be ran marahi kunira gairua uhu.”

³² Haḡe vagahin Silo, mwa bevea lalai Jisas be, “Kea haḡea Vagahi! Gom bevea kunia mwasigi, Ratahigi gaituvwa n̄an gabe God, god mulei sigai kunia ta kea gaituvwa n̄an.

³³ Atatu vi lolotabetabe God gin lolona duluai, gin binihina duluai, gin non muramura duluai; i vi tabe atatu dolua mulei kunia sibona. Nu tavuha maragai be vi tabe leo horai gairua kera uhu liua, ninia be men laiana na sipsip sage hava te tataroi tuntun lalai God.”

³⁴ Jisas mwa ron̄oe be non avoan vwaliu nu tavuha mwa avo gin mataisao haḡe mwa bevea lalainia be, “Gom hav vora te hautu nin ute Ratahigi non God.” Ataguna uhu atatu mwa hav mom hudali te Jisas gin avoan hudaligi.

Avoan Hudaligi huri Kraes

³⁵ Mahavana be Jisas mwa bagahi lol Imwa Tataro, mwa lai avoan hudaligi mwa bevea be, “Kun hanigi be ira vagahin Silo ram bevea be Kraes kea vi vora ata alun varan Deved?

³⁶ Vui Sabuga nu hogoinia lalai Deved be vi vevea be: ‘God Ratahigi mwa bevea lalai noḡu Ratahigi be, Gov togo la mwatuaku, vava nav tau nom ivwalu gi tanon vavarahin bwalagemwa.’

³⁷ Deved mwa uloinia sibona be, ‘Ratahigi’; kun hanigi be Kraes vi vora kea ata la varan Deved?” Sinombu ivusi ram ron̄ Jisas gin samsamwara.

Jisas mwa Ivwalui ira Vagahin Silo

³⁸ Batena be mwa bagahira mwa bevea be, “Giv gitaḡoro huri ira vagahin Silo, kera ram doron be rav lago mai gaisaga n̄an̄ava i ram doron maragai silo lai ḡoḡo huribe atatu rav binihi marahinira lol saran volvoligi i ram doron be rav lai tanon togotogo haehae lol imwa tataro i mai tanon togotogo tavuha lol gina ganian lavoa,

³⁹ Kera ram ḡitalua tanon togotogo tavtavuha lol imwa tataro i tanoi tavtavuha lol ginaganian lalavoa.

⁴⁰ Ram ḡan bahiru ira bwero aten imwara i ram lol tataro n̄ava be men gitana. Silo vevegi hurira vi hantai liu!”

Hogoi non Bwero Vavine

⁴¹ Haḡe Jisas mwa do mahuri aben tanon hom vohai lol Imwa Tataro kea mwa ḡita sinombu gabe ram bohai nora homu. Atat rosoga ivusi ram bohai homu gaivua;

⁴² i mulei mwa ḡita bwero vwate gabe hiru mwa bohai non hogoi seleng matotobwai gairua, nu dadariha mai peni gaituvwa.

⁴³ Haḡe mwa uloi ḡoḡora non roron̄tai mwa bevea lalainira be, “Nam bevea lalai kimiu be, bwero hiruga uhu nu vohai liu ninira duluai.

⁴⁴ Bwatuna kera rituai ran lai nora hogoi nin rosora gabe mwa hovi nin bilara; take kea, mwa lai duluai bilana kea gabe mwa rahu ginia.”