Lalaḡova 8 - Hano Niu Testamen

¹ Sol mwa ron̄oe kun be nu tavuha n̄ano be ram wehi Stivin la hala kunia. I mwa dau bwatuna baten gea ram lol ḡagaras atatun uloilua Jerusalem. Ira binihimwasigi duluai ram romaragai vataha ute lol vanua Judia i Samaria duluai, vaivotu be ira hala n̄an sigai.

Sol mwa lol Ḡagaras Uloilua

² Haḡe ira binihimwasigi rituai ninira Jius ram dan̄ihi Stivin maragai i ram davinia.

³ Take Sol mwa lol ron̄oe be vi salan̄ai uloilua, i mwa bano vataha imwa, mwa lol ira binihimwasigi vavine mai atamwani be rav togo vauhi, i mwa daura lol imwa vauvauhi.

Mwa Doretore huri Leo Tavuha lol vanua Samaria

⁴ Haḡe ira binihimwasigi be ran rov maragai ram doretore huri roroi tavuha lol vanua Samaria.

⁵ Vilip nu vano lol muan bwatutun vanua ata Samaria i mwa doretore huri Wani Vurai lalai sinombu aia.

⁶ Haḡe sinombu gaivua ram dogo biviria i ram roron̄tai havanau gabe Vilip mwa bevea i ram ḡita ginau dan̄an̄a be mwa lolia.

⁷ Vui hantai ram mwalue nin sinombu gin silo gaivua, i kera ivusi gabe rebehira ram mate i ram luḡu ram rahu n̄oton̄oto.

⁸ Haḡe samwarana gaivua maragai lol bwatutun vanua gea.

⁹ Atatu vwate aia ihana Saimon nu lol sinombu ata Samaria gin non vui son̄son̄o. I mwa bevea sibona be kea atat gaivua vwate,

¹⁰ sinombu duluai lol bwatutun vanua, vataha tatan̄an lalaḡova ram do biviria, ram roron̄tainia, ram bevea be, “Kea mwa haḡo muramura gabe mwasin muramura non God.”

¹¹ Sinombu ram do biviri maragainia ram roron̄tai bwatuna be nu lolira tuai huba ram dan̄an̄ainia gin non vui son̄son̄o.

¹² Take mahavana be ram binihimwasigi avoana non Vilip huri Roroi Tavuha huri Rahuan gara gabe God mwa bora ratahigi ḡoro non sinombu alolona, i huri Jisas Kraes ira vavine mai atamwani duluai ram lai garuhisabuga.

¹³ Saimon sibona mulei mwa binihimwasigi, i ataguna be mwa ḡaruhi sabuga, kea mwa dogo sosori gin Vilip mwa dan̄an̄ainia mahavana be mwa lol ginau dan̄an̄a tagaro.

¹⁴ Haḡe ira hala Jerusalem ram ron̄oe be sinombu ata Samaria ran lai avoana non God, i ram hora Pita mai Jon vai abera.

¹⁵ I mahavana be ramuru botu ramuru dataro huri ira binihimwasigi be rav lai Vui Sabuga.

¹⁶ Bwatuna be Vui Sabuga mwa hav hivo te radu vai alun atatu vwate, take ran lai garuhisabuga n̄ano la ihan Ratahigi Jisas.

¹⁷ Haḡe Pita mai Jon ramuru dau limara alura, i ram lai Vui Sabuga.

¹⁸ Saimon mwa ḡitae be mwa lai Vui Sabuga lalai ira binihimwasigi mahavana be ira hala ram dau limara alura. Kunia Saimon mwa lai homu lalai Pita mai Jon,

¹⁹ mwa bevea lalainira be, “Giruvi lai muramura geki mulei lalaiau, huribe atatu gabe nav tau limaḡu alura rav lai Vui Sabuga.”

²⁰ “Nom homu vi vano kaburai vai tuai, i giḡo mulei maia, bwatuna be gom binihia be goi vol dum hogoi non God gin homu!

²¹ Giḡo gom hav vora te gaituvwa mai kamai, bwatuna be lolomwa nu hav vavtutu tehe mai God.

²² Gov vinihi nom taritari hantai geki, i gov tataro lalai Wani Vurai be vi binihi kaburai Vuromwa huribe gom binbinihi alun ginau kun geki.

²³ Bwatuna be nam ḡitago be gon masiri gin binihiv hahantai aten gao vauvauhi non bwatigoro.”

²⁴ Haḡe Saimon mwa bevea lalai Pita mai Jon be, “Giru vi tataro lalai Ratahigi huriau, huribe ginau vwate gabe gumuru avo aluna sihav dumwiau tehe.”

²⁵ Mahavana be ram bev havanau be ram iloe huri Jisas i ram seserai roroi jon Ratahigi, Pita mai Jon ramuru dabagilu mulei vai Jerusalem. I lol nora vanoana ramuru doretore huri Roroi Tavuha lol vanua ivusi Samaria.

Vilip mai Tomuai vwate ata Itiopia

²⁶ Haḡe enjel non Ratahigi mwa bevea lalai Vilip be, “Gov lol vatuvwai ba bano vai tavalun vanua la hala gabe mwa bano nin Jerusalem vai Kasa.” (Hala geki mwa hav huriniana tehe vaivotu garigi.)

^27-28 Haḡe Vilip mwa lol vatuvwai i mwa bano. Haḡe kunia tav kaburai vwate ata Itiopia, kea atat lavoa vwate i mulei tomuai ḡoro huri atatun homu non ratahigi lavoa vavine vwate ata Itiopia. Kea nu vano vai Jerusalem be men gogonai God i mwa dabagilu mulei vai la vanuana mwa rovo la kat. I mahavana be mwa rovo la hala kea mwa basogo buka non atatun Vevsera Aesaia.

²⁹ Haḡe Vui Sabuga mwa bevea lalai Vilip be, “Goi van sosori kat gea ba du sosoria.”

³⁰ Vilip mwa ban sosoria i mwa ron̄ dumwia be mwa basvasogo alun buka non atatun vevsera Aesaia. Haḡe mwa hudalinia mwa bevea be, “Gom ilo havanau gabe gom basogoe?”

³¹ Haḡe tomuai gea mwa bwaliua mwa bevea be, “Kunhanigi be nav ilo dumwia vaivotu be atatu vwate vi tugu halana lalaiau?” Haḡe mwa hudali Vilip be vi hae ba domahuri la kat bul maia.

³² Geki haḡea tavihen avoan a gabe nu vasogoe, i mwa bevea be, “Kun sipsip gabe mwa laiana be men wehiana, kun sipsip mwa buhiga mahavana be ram bal kaburai iluna, i mwa hav vev te avoana vwate.

³³ Kea mwa lin̄ maḡemu, alun vavtutu vai aluna. Atat vwate sihav vev te dumwia huri varana bwatuna mwa botui nogonan rahuna lol ureure.”

³⁴ Haḡe tomuai mwa hudali Vilip mwa bevea be, “Goi vevea lalaiau be, atatun vevsera mwa bevea huri i hei geki? Huria sibona sage huri atat dolua?”

³⁵ Haḡe kunia Vilip mwa dau bwatuna mwa avo, mwa bwativugainia alun tavihen leo tavuha geki, mwa bevea lalainia alun Roroi tavuha huri Jisas.

^36-37 I mahavana be ramuru hivo radu la hala, i ramuru botui ute gabe wai rituai aia, haḡe tomuai gea mwa bevea lalainia be, “Geki haḡea wai rituai. I havanau tehe mulei vi mom lol ḡoroau be namen lai garuhisabuga? Nam binihimwasigi be Jisas Kraes kea Nitun God.”

³⁸ Haḡe tomuai mwa haḡo batugehi kat mwa mambu, i kera saraḡo Vilip mai tomuai ramuru hivo vai alolon wai, i Vilip mwa garuhisabugainia.

³⁹ Mahavana be ramuru mwalue nin wai, Vui non God mwa lai dagai Vilip. Haḡe tomuai mwa hav nom ḡitae tehe mulei, take kea mwa hivo rahurahu la halana, i mwa masiri gin samwarana.

⁴⁰ Vilip mwa botu la vanua Asdod, i mwa ban rahurahu vaivotui vanua Sisaria, i la non lagoana gea mwa doretore huri Roroi tavuha lol ute duluai.