Hibru 9 - Hano Niu Testamen

Tatauleo ata Tuai

¹ Lol muan tatauleo ira silon gogonai i taron gogonai be ginau geki ata lol ureure n̄ano.

² Imwa haohao sabuga gea vwavwana gairua. Muan vwavwana ram uloinia be Ute Sabuga, lol vwavwana gea gaihaḡon ira bulu be ram dogo aluna mai olta huri ginaganianan sabuga.

³ Ram harabora vwavwana gea gin gavu i ram bevea be vwavwana gea be Ute Sabuga Liu. Lol vwavwa gea olta vwate huri tataroi tuntun. Olta geki ran lolia gin vatan̄oga. Ginau dodolua mulei ram du lol vwavwana gea i bugoron dameana mwa dogo aia be ram haḡoia gin vatan̄oga.

⁴ Alolon bugoron dameana gea botele vwate aia be ran lolia gin vatan̄oga i udun ata tuai be ran huia be mana mwa dogo alolona. I gaisigon Eron mulei mwa dogo alolona mwa mauri i mulei vatu gairua mulei be silo nu ravana aluna.

⁵ La ulun bugoron dameana gea vingaga gairua ramuru seserainia be God mwa dogo. Gabaura mwa ḡagav ute be God mwa lai dagai vuro aia. Take kadogaha taro sigai be nai vev tatavihei duluai.

⁶ Geki haḡea alen̄an imwa hahao sabuga. Vataha gubwen̄i ira tataroi ram hae aia be ramen lol nora rovoga.

⁷ Vatuvwa lol taulu muai tataroi sibona mwa haroro alolon vwavwana sabuga gea. Mwa du maragai be kea vi lai daga i mwa ḡaburainia huri vurora i vuron sinombu be ram lol vuro take ram len̄a be vuro.

⁸ Mai ginau duluai geki Vui Sabuga mwa seserainia lol taro be imwa haohao nu tu radu, hala sigai be men mahavan̄i huri gida be tav haroro lol Ute Sabuga Liu.

⁹ Nunu vwate be mwa seserai lua ginau ata garigi. Ira hogoi i ira tataroi tuntunu be ram hogoinia lalai God ran hav dadariha tehe be rav lol atatu rav melmelo.

¹⁰ Ira silo gea ram bevea huri ginaganiana i wai mai alen̄an bwagabwaga ginau. Ira silo geki rav tu vaivotu be God vi leahi ginau duluai vi mai gi ginau gara. Take kadogaha Kraes nu mai huba gi muai tataroi huri ginau tavtavuha be vi mai.

Tatauleo Gara

¹¹ Imwa haohao sabuga gea be mwa dogo alolona nu liu nin ata amua. Imwa gea atatu ram hav lolia tehe, nu hav vorate ginau non ureure be God nu lolia.

¹² Kraes nu haroro huba lol vwavwana be Ute Sabuga Liu take nu hav lai te dagan buluki i nani. Take nu lai dagana sibona i nu lai varahuva be mosmosianana nu sigai.

¹³ Tuai dagan buluki, i nani i beben mwalkeloi buluki be ran tunura la olta. Ira muai tataroi ran darudaruainia gaitutuvwai alura be ran hav melmelo tehe lolmatan God. Bwatuna gea kera ram melmelo mulei.

¹⁴ Take dagan Kraes vi lol rovoga wasi maragai. Kraes nu kun ginau rahu be ginau vwate nu hav hantai tehe lol rebehina be ram wehia huribe men lai dagai vuron atatu. Gin muramura non Vui Sabuga be mwa dogo vataha mahavana mwa lai rahun Kraes vai aben God. Dagana mwa lol binihinda mwa melmelo lol ginau duluai be tam lolia, huria be tav lol dum rovoga non God be mwa rahu.

¹⁵ Huri ginau geki Kraes haḡea mwasin atatu be vi lol dautau tatauleo gara geki. Bwatuna gea atatu be God mwa uloi luara rav lai dum vatavuha vai tuai be God nu tatauleo huria lalainira. Mateanan Kraes haḡea vi lolia rav lai dum vatavuha.

¹⁶ Be atatu vi lol non tatauleo be batena be vi mate non vataha ginau vivora non atat dodolua, nu melmelo mwasigi be atatu gea vi mate amua huria be tatauleo gea vi tu.

¹⁷ Tatauleo kunia si hav loli tehe lol taro be wani gea be nu vevea mwa hav mate te radu. Tatauleo kunia vi loli n̄ano la mahavana be wani be nu tatauleo nu mate huba.

¹⁸ La hala gea huri muan tatauleo non God be mwa dogo dagan ira ginau rahu rav rovo huria be vi lol tatuleo gea vi tu.

¹⁹ Moses mwa avo maira ata tuai mwa bev ira silo kokolo rituai be ram mauri la silo lalavoa. Ataguna mwa lai dagan ira buluki i nani mwa salil roroia mai wai. Mwa lai raun gai mai ilun sipsip be nu memea mwa darudaruainia la bukan silo i la sinombu.

²⁰ Mwa bevea be geki haḡea daga be vi lol silo non God vi tu. Tatauleo geki God nu vevea huba be tav roron̄tainia.

²¹ Kunia mulei, Moses mwa daruai daga la imwa haohao i la ginau duluai be mwa haḡoana lol taron gogonai.

²² La alen̄an silo geki mwa abena be ginau n̄oto lalaḡo mwa ḡaburai daga huria be ginau duluai rav melmelo, lolmatan God. Kebe daga vwate sihav rovo tehe God sihav lai te dum lua vuron atatu.

Dagan Kraes mwa Rovo be men lai Dagai Vuro.

²³ Ginau kera geki be ira tataroi tuai ran haḡoe be ramen gogonai alen̄a ran ḡun nunun ginau be ram du lol ute atamare. Mwa du maragai be daga vi rovo ba lolira be ramen melmelo. Take ira raumatan ginau be ram du lol ute atamare mwa du be vora dagan ginau vwate be nu tavuha liu be vi rovo be men lolira ramen melmelo.

²⁴ Kraes mwa hav haroro tehe lol Ute Sabuga be atatu sibora ran lolia be nunu n̄ano huri raumatan ginau. Take Kraes mwa haroro lol ute atamare sibona i kadogaha mwa du amare lolmatan God be men avo huri gida.

²⁵ Muai tataroi tuai nu hae lol Ute Sabuga Liu vatuvwa lol taul gaituvwa mai dagan ginau rahu. Take Kraes nu hav hae tehe vaivusi be men lin̄ rahuna lalai God.

²⁶ Be sivora kunia Kraes si lin̄ muleinia vaivusi la bwatun tauva vaivotu garigi. Ninia gea nu lin̄ dagana vatuvwa n̄ano batena be ureure mwa abena be men nogo. Kea nu lin̄ dagana vatuvwa n̄ano be nu dadariha be men lai dagai vuron atatu.

²⁷ Mwa du be atatu duluai rav mate vatuvwa i God vi vevegira.

²⁸ Kunia Kraes mwa lin̄ muleinia gi tataroi vatuvwa n̄ano be men lai dagai vuron sinombu. Kea vi mai mulei varuana, take lol taro gea mwa hav mai tehe be men lin̄ muleinia huri vuro, take men lai rahuana hurira be ram hohovia.