2 Tesalonaeka 1 - Hano Niu Testamen

¹ Nin Pol, Sailas i Timoti. Lalai atat binihimwasigi duluai ata Tesalonaeka lol ihan God tamanda i nonda Ratahigi Jisas Kraes:

² Hogoi i tamwata lalai kimiu nin God, tamanda i nonda Ratahigi Jisas Kraes.

Pol mwa Avo huri Binihimwasigi non ata Tesalonaeka.

³ Ira tuaku mai ira hogosiku, tav avkari God vataha mahavana huri kimiu. Geki haḡea nu vavtutu, bwatuna be nom binhimwasigi garagusi mwa mauri vataha mahavana, i lolotabetabe be kimiu duluai gim do maia, huri be kimiu gaitutuvwai gim mauri.

⁴ Gam sagerei kimiu lalai atatun uloilua non God. Gam bevea lalainira huri hala be gim lolia. Gam bev luae lalainira be nomiu binihimwasigi mwa du wasigi, batena be gim ron̄ mwahantai be kera ata avare ram ḡoro kimiu.

⁵ Ira taro ririhai gea be gim dogo alolona ram seserainia be alen̄an God huri vevegi nu vavtutu n̄ano. God kea nomiu Ratahigi lavoa i God mwa bev luae be kimiu gin dadariha be giv ron̄ ḡagarasi huri ihan God.

⁶ God vi lol hano be nu vavtutu. Vi lai silo vevegi lalainira be ram bevegigo.

⁷ I vi lai mabuana lalai kimiu be gim ron̄ ḡagarasi i lalai kamai mulei lol taro be Ratahigi Jisas vi visirai mai gabi oda nin amare mai ira non enjel muramuraga.

⁸ Kea vi vevegi kera be ram len̄ai God i ram hav tabe tehe roroi tavuha huri Ratahigi Jisas Kraes.

⁹ Atatu keragea rav lai silo vevegi i ron̄ ḡagarasi be vi tu vai tuai. Rav togo dagai nin God i nin non muramura.

¹⁰ Geki vi loli lol gubwen̄i be God ratahigi vi mai i atatu be non atatu rav uloi roroainia. I sinombu duluai be ram binhimwasigi rav dan̄an̄a gin Jisas. Giḡo gov togo lol tatan̄ana gea bwatuna be gom binihimwasigi havanau be gam bevea lalainigo.

¹¹ Kea haḡea huri hano gam dataro ḡaoḡao huri kimiu, gam hudali God be vi bului kimiu be giv togo la rahuana gabe nu uloi kimiu be giv togo aluna. Gam dataro be mai non muramura, God vi bului kimiu be giv lol ginau tavuha be gim doronia i giv lol rovoga be ram mai nin nomiu binihimwasigi garagusi.

¹² Gam dataro duluai kun geki huribe ihan ratahigi Jisas Kraes vi sarisari alolomwa, i giḡo gov lol roroai ihana. Sarisari gea mwa mai nin hogoi non nonda God i ratahigi Jisas Kraes.