1 Korin 8 - Hano Niu Testamen

Avoana huri Ginaganiana be mwa Laiana lalai Nun Vatu.

¹ Kadogaha nav avoinia huri ginau duluai gabe gon ravae lalaiau huri nun vatu. Tam iloe be gida duluai “nonda iloilo abena.” Iloilo mwa sogai luago be gomen ravwega, take lolotabetabe mwa mauri hae.

² Be gom binibe gom ilo ginau vwate, gam hav ilo te ginau radu kebe mwa du be si vora kunia.

³ Take be atatu vwate mwa dabe God, atatu gea God mwa iloe.

⁴ Geki haḡea hano be nam bevea huri bigi be mwa dataroinia lalai nun vatu. Tam iloe be nun vatu kea vorate ginau vwate lol ureure, i tam iloe be God gaituvwa n̄ano.

⁵ Len̄len̄a be ginau rituai mwa uloiana be “ira tagaro,” amare sage ata kea aia “ira tagaro” i “ira ratahigi,”

⁶ take lalai gida God gaituvwa n̄ano gabe tamanda. Ginau duluai ram mai ninia, i tam rahu huria. Mulei Jisas Kraes gaituvwa n̄ano. Ginau duluai mwa loli sivinia, i gida mulei tam bora sivinia.

⁷ Take vorate atatu n̄oto ram ilo ginau geki. Atatu rituai ram binihi dum radui nun vatu i lol taro be ram ḡan bigi. Ram binihi dumwia be ran tataroinia lalai nun vatu. Binihira ran mandamanda, lol taro be ram ḡania, ram ron̄oe kunbe ran vahala.

⁸ Take ginaganiana si hav lai te gida sosori vai aben God. Take be tasav gan te ginau, tan vahal ginau vwate. Take be tav gan ginau, tam lai ginau tavuha vwate.

⁹ Binihimiu nu maribwesi. Gov gitaḡoro be nom binihiva si hav lolira tehe be ran mandamanda lol binihimwasigi garagusi be rav hovi lol vuro.

¹⁰ Giḡo gon “mataisaoga,” i gom ḡan ginau lol imwa tataro non ira nun vatu. Take atatu vwate be non binihiva lol vui nu mandamanda vi gitago be gom ḡan ginau aia. Kea vi lolia be vi gan ginau be mwa laiana lalai nun vatu be vi iloe be nu hantai be vi lolia.

¹¹ Atat mandamanda geki be tuamwa, Kraes nu mate huria mwa hantai mwa liu bwatun nom “iloute.”

¹² Lol taro be gom buroga vai alun ira tuamwa lol Kraes kun geki i gom lolira ram lol hano be ram iloe be nu vahala, kea gom buroga vai alun Kraes.

¹³ I ginaganiana be nam ḡania mwa lolira be ramen hovi lol vuro, na sa mom ḡan te bigi mulei be nav lol ira tuaku rav hovi lol vuro.