THUVARHAI 17 - Pathien Lekhabu Inthieng (BSI)

¹ Inhal puma ruoiṭhe rawpna insûng nêk chun, Lungdamtaka bu bâr khat fâkna a ṭha lem.

² Siehlaw vartaka thaw hlaktu chun naupa, inzakna intlun hlaktu, chunga chun rorêl a tih. Unauhai laiah rochan nei bawk a tih.

³ Rawtuina bêl chu tangkaruo ta ding a na, pûm mei chu rângkachak ta ding a nih, Lalpa ruok chun lungril a fie hlak.

⁴ Thil suol thawtu chun hmûr khawhlohai chu a ngaisak a, Chun mi khêlinhlip chun lei pawitâwk tieng chun na a sit.

⁵ Tukhawm mi pasie nuisan chun a siemtu a hmusit a nih. Vângduoina diriemtu chu hrem lo ni naw nih.

⁶ Nauhai nauhai chu mi upahai lallukhum an na, Chun, nauhai ropuina chu an pahai chu an nih.

⁷ Thuhril ṭhatak le invêt ân mawi ngai naw a, Hmûr khêlinhlip chu lal nau leh ân mawi naw nâwk zuol.

⁸ Thamna hi a neitu ta ding chun mithaia lung hlutak ang a na, Ân her vêlna taphawta chun a hlawtling hlak.

⁹ Bawsietna inkhumtu chun hmangaina a zawng a, Thil hril hriltu ruok chun ṭhien bul a ṭhe.

¹⁰ Kâwkna hi hrietna nei mia chun a lût thûk lem, Invêt vawi za khat vuok nêk hmanin.

¹¹ Mi rilo chun hêlna chau a zawng a, Chuleiin, ama kuoma chun mitir nunsetak tir nîng a tih.

¹² Invêt ân vêt laia intuokpui nêk chun, Savawmpui a tehai inrûkpêka um intuokpui nuom a um lem.

¹³ Tukhawm thil ṭha aia thil ṭha naw pe lem chu, Thil ṭha naw a ina inthawkin fe hmang ngai naw nih.

¹⁴ Insuolna hung inṭan dân hi miin tui a hersuok ang chau a nih, Chuleiin, inhalna chu insuolna a um hmain mâksan rawh.

¹⁵ Mi khawhlo chu thiem inchangtir a, mi fel chu thiemnaw inchangtir chu, Chu ve vehai chu angkhata Lalpa ta dinga tirdakum a nih.

¹⁶ Hrietthiemna a nei naw chun, Varna inchâwkna man ding invêt kuta chun ieng dingin am um a ta?

¹⁷ Ṭhien chun ieng lai khawmin a hmangai a, Unau chu lunginzîng ni dinga pieng a nih.

¹⁸ Mi hrietthiemna nei lo chun a kuthai a ben a, A tuolbâwm hmaihmaa chun mawphurtu a hung ni hlak.

¹⁹ Bawsietna ngainatu chun inhalna khawm a ngaina a, A dâi kawtkhâr dawm sângtu chun sietna a zawng a nih.

²⁰ Lungril chapo neitu chun thil ṭha a hmu ngai naw a, Lei khêlinhlip neitu chu pawitâwknaah a tlu lût hlak.

²¹ Nau invêt neitu chun a lungngaina chau dinga nei a na, Chun, invêt pa chun hlimna a nei bawk nawh.

²² Lungril hlim chu damdawi ṭha a na, Lungril serawp ruok chun ruhai a sukṭâwl hlak.

²³ Mi khawhlo chun ângsûnga inthawkin thilthlâwnpêk chu a lâk a, Rorêlna lampuihai chu a sukkâwi hlak.

²⁴ Varna chu hrietthiemna neitu hmaihmaa chun a um a, Invêt mithai ruok chu leihnuoi tâwpa chun an um.

²⁵ Naupa invêt chu a pa ta dinga lunginrimna a na, A neitu nu ta ding chun rimsikna a nih.

²⁶ Mi fel inchawitir chu a ṭha naw a, Mi ṭha an tluongna leia vuok khawm chu a ṭha chuong nawh.

²⁷ A thuhai hla tâwk nei mi chun hrietthiemna a nei a, Lungril dei nei mi chu hrietthiemna nei mi a nih.

²⁸ Invêt khawm, a to ṭawk lai chun mi vara ngai a na, A hmûrhai ân chip tlat lai chun mi var anga ngai a nih.