LEVI DÂN 4 - Pathien Lekhabu Inthieng (BSI)

Suol Inthâwina

¹ Lalpa chun Mosie a biek a,

² “Israel mihai chu hril la, an kuomah, ‘Lalpain thawlo dinga thu a pêkhaia hin, a ienga khawm mîn suksuol palin, a ieng ieng khawm hi lo thaw ta sienla,

³ a suksuoltu chu hriek nâla um thiempu a ni a, mipuihai chungah thiemnaw inchangna ân tlungtir chun, a thil suksuol tah suol inthâwina ding chun, Lalpa kuomah bâwng tuoi demkailo inhlân raw se.

⁴ Bâwng chu intuokna puon in kawtkhâr bulah Lalpa hmaa chun hung kei a ta, a lu chungah a kut innghat a ta, Lalpa hmaah bâwng chu a that ding a nih.

⁵ Hriek nâla um thiempu chun bâwng thisen ieng zât amani chu lâng a ta, intuokna puon ina chun hung chawi a ta;

⁶ thiempu chun thisena chun a kutpâr inchieng a ta, hmun inthieng puonzâr hmaa chun, Lalpa hmaah vawi sari thêng a tih.

⁷ Chun, thiempu chun a ṭhen chu Lalpa hmaah, intuokna puon ina riminhniktak maichâm kihaia chun thisen chu tlâwmte nâl a tih; chun, bâwngchal thisen la um po chu intuokna puon in kawtkhâr kâwla pumrawhmang thilinhlânna maichâm bula chun a bunthlâk ding a nih.

⁸ Chun, suol inthâwina bâwngchal thâu po po chu la vawng a ta, a sûng thâu le a rîlbâwtu po po leh,

⁹ a kal pahnihai le a tuomtu duorda a diemnêma mi le a kalhai pumin a thin tuomtu duorda le chun,

¹⁰ inremna thilinhlânna bâwngchala mi angin phawr vawng a ta, thiempu chun pumrawhmang thilinhlânna maichâma chun a râw ding a nih.

¹¹ Chun, bâwngchal vun le, a sa po po, a lu, a kêhai, a sûnghai le a êk leh;

¹² bâwngchal pumpui el chu, riebûk puotieng hmun faiah vut bunthlâkna hmuna chun hung lâng a ta, thing chungah meiin a râw ding a nih; vuthai bunthlâkna hmun ngeia chun râw a ni ding a nih.

¹³ “Chun, Israel mi po poin an suksuol pal a, mipui mithmua thupa umin, Lalpain thaw lo dinga thu a pêkhai, a ieng khawm chu an thaw a, thiemnaw an chang a,

¹⁴ an thil suksuol chu hriet suok a ni chun, mipuiin suol inthâwina dingin bâwng tuoi inhlân an ta; intuokna puon in tuola chun an hung kei ding a nih.

¹⁵ Chun, pungkhâwmhai laia upahai chun Lalpa hmaah bâwng lu chunga chun an kuthai innghat an ta, bâwng chu Lalpa hmaa chun that ding a nih.

¹⁶ Chun, hriek nâla um thiempu chun intuokna puon ina chun bâwng thisen aṭhen chu hung chawi a ta;

¹⁷ thiempu chun thisena chun a kutpâr inchieng a ta, puonzâr bulah Lalpa hmaah vawi sari a the ding a nih.

¹⁸ Chun, thisen aṭhen chu intuokna puon inah Lalpa hmaah maichâm kia chun nâl a ta, thisen la um po chu intuokna puon in kawtkhâr kâwlah pumrawhmang thilinhlânna maichâm bula chun a bunthlâk ding a nih.

¹⁹ A thâu po po chu la vawng a ta, maichâma chun a râw ding a nih.

²⁰ Chuong ang chun bâwng chu thâwng a ta; suol inthâwina bâwng a thaw ang charin hi khawm hi a thaw ding a nih; chun, thiempu chun intlanna siempêk a ta, ngaidam ni tâng an tih.

²¹ Chun, bâwng chu khawhnâwm tieng fepui a ta, bâwng hmasa a râw ang khan a râw ding a nih; chu chu mipuihai ta dinga suol inthâwina a nih.

²² “Rorêltuin thil a suksuol a, Lalpa a Pathienin thaw lo dinga thu a pêkhai po po kha a ieng ieng khawm a thaw pal a, thiemnaw a chang a,

²³ a thilsuol thaw chu inhriettir a ni chun a thilinhlânah kêlchal, demkailo hung kei a ta;

²⁴ kêl lu chunga chun a kut innghat a ta, Lalpa hmaa pumrawhmang thilinhlân an thatna hlaka chun a that ding a nih; chu chu suol inthâwina a nih.

²⁵ Chun, thiempu chun suol inthâwina thisen chu a kutpârin tlâwmte lâng a ta, pumrawhmang thilinhlânna maichâm kihaia chun nâl a ta, pumrawhmang thilinhlânna maichâm bula chun a thisen la um po chu a bunthlâk ding a nih.

²⁶ A thâu po po chu intlanna thilinhlân inthâwina thâu a râw angin maichâma chun a râw ding a nih; chun, a suol chungchâng thua chun thiempu chun intlanna siempêk a ta, ngaidam nîng a tih.

²⁷ “Vântlâng laia mi tukhawmin Lalpain thaw lo dinga a thupêkhai a ienga khawm suksuol palin, thiemnaw lo chang ta sienla,

²⁸ thil a suksuol chu inhriettir a ni chun a thilinhlânah kêl, a pui demkailo, a thil suksuol tah suol inthâwina dingin a hung kei ding a nih.

²⁹ Suol inthâwina ding lu chunga chun a kut innghat a ta, pumrawhmang thilinhlânna hmuna chun suol inthâwina chu a that ding a nih.

³⁰ Thiempu chun thisen chu a kutpârin tlâwmte lâng a ta, pumrawhmang thilinhlân maichâm kihaia chun nâl a tih; a thisen la um po chu maichâm bula chun a bunthlâk ding a nih.

³¹ Chun, a thâu po po chu intlanna thilinhlân thâu an lâk angin la vawng a ta; chun, thiempu chun Lalpa ta dinga rim inhnik ni dingin maichâma chun a râw ding a nih; chun, thiempu chun intlanna chu siempêk a ta, ngaidam nîng a tih.

³² “Suol inthâwina dinga a thilinhlâna berâmte a hung chawi chun, a la demkailo a hung chawi ding a nih.

³³ Suol inthâwina lu chunga chun a kut innghat a ta, pumrawhmang thilinhlân an thatna hmuna chun suol inthâwina dingin a that ding a nih.

³⁴ Thiempu chun suol inthâwina thisen chu a kutpârin tlâwmte lâng a ta, pumrawhmang thilinhlânna maichâm kiahai chun nâl a ta, a thisen la um po chu maichâm bula chun bunthlâng a tih.

³⁵ A thâu po po chu, berâmte thâu intlanna thilinhlân inthâwinaa mi lâk angin la vawng a ta; chun, thiempu chun Lalpa ta dinga mei hmanga thilinhlân angin maichâmah a râw ding a nih; chun, thiempu chun a thil suksuol ta chungchânga chun intlanna siempêk a ta, ngaidam nîng a tih.