LEVI DÂN 1 - Pathien Lekhabu Inthieng (BSI)

Rawhmang Thilinhlân

¹ Lalpa chun Mosie a ko a, intuokna puon ina inthawkin a biek a,

² “Israel mihai chu hril la, an kuomah, ‘Nangni laia tukhawmin thilinhlân Lalpa kuoma in inhlânin, ran, bâwng ruol le berâm ruol laia mi, in inhlân ding a nih.

³ “A thilinhlân chu bâwng ruol laia mi, pumrawhmang thilinhlân a ni chun a chal, demkailo ân hlân ding a nih: ama chu Lalpa hmaa pawm a ni theina dingin intuokna puon in kawtkhâr bula chun ân hlân ding a nih.

⁴ Pumrawhmang thilinhlân lu chunga chun a kut innghat a ta; chuongchun, a ta dingin intlanna siemna dingin pawmpêk ning a tih.

⁵ Lalpa hmaa chun bâwngchal that a ta; Aron naupasal thiempuhai chun thisen chu inhlân an ta, intuokna puon in kawtkhâr bula maichâm chu thisen chun the huol an tih.

⁶ Pumrawhmang thilinhlân chu inhlip a ta, chan nawi a tih.

⁷ Chun, thiempu Aron naupasalhai chun maichâma chun mei sieng an ta; mei chunga chun thing sep khâwm an tih.

⁸ Aron naupasal thiempuhai chun sa tlin dâm, a lu dâm, a thâu dâm chu maichâma chun mei chunga thinga chun sie fel diem an ta;

⁹ a sûnghai le a kehai ruok chu tuiin sâwp an ta; thiempu chun Lalpa ta dinga rim inhniktak, mei hmanga thilinhlân pumrawhmang thilinhlân dingin a pum chun maichâma chun a raw ding a nih.

¹⁰ “A thilinhlân chu pumrawhmang thilinhlân dinga ran ruol laia mi, berâm amanih, kêl amanih a ni chun, a chal demkailo ân hlân ding a nih.

¹¹ Maichâm sîr hmârtieng pangah Lalpa hmaah that a ta, Aron naupasal thiempuhai chun maichâm chu a thisen chun an the huol ding a nih.

¹² Chun, chan nawi a ta, a lu leh a thâu leh; thiempu chun maichâm chunga mei chunga thinga chun sie fel diem a ta;

¹³ a sûnghai le a kehai ruok chu tuiin sâwp a ta, a pumin thiempu chun inhlân a ta, maichâma chun a raw ding a nih; Lalpa ta dinga riminhniktak, mei hmanga pumrawhmang thilinhlân a nih.

¹⁴ “Lalpa ta dinga a thilinhlân chu vate tieng pumrawhmang thilinhlân a ni chun, a thilinhlâna chun, vaṭhuhai amanih, pârvate amanih ân hlân ding a nih.

¹⁵ Thiempu chun maichâma chun hung chawi a ta, a lu chu her bawng a ta, maichâma chun râwng a ta, a thisen chu maichâm panga chun infar kangtir a tih.

¹⁶ A awng chu a hmul le chun pei a ta, maichâm kâwl, saktieng panga vut siena hmuna chun pei a tih.

¹⁷ A thla le a thla inkârah thlêr a ta, a puma thlêr suok ruok chu ni lovin; chun, thiempu chun maichâmah, mei chunga thinga chun a raw ding a nih; chu chu Lalpa ta dinga riminhniktak, mei hmanga thilinhlân, pumrawhmang thilinhlân a nih.