JOSUA 21 - Pathien Lekhabu Inthieng (BSI)

Levi chihai khawpuihai chu

¹ Chun, Levi chia mi sûngkuo tin lû tak peihai chu thiempu Eleazar kuoma le Nun naupa Josua kuoma le Israel hnama sûngkuo tin lusahai kuoma chun an va fe a,

² Kanaan rama khawpui Silo khuoa chun, “Lalpain Mosie hmangin kan umna ding khawpuihai, kan ran tlatna ding a khawkâwl vêl leh mi pe dingin thu a lo pêk kha a ni ie,” tiin an hril a.

³ Chuongchun, Israel thlahai chun Lalpa thupêk angin an chanpuola inthawk chun chuong khawpuihai chu an khawkâwl vêlhai le chun Levi chihai chu an pêk ta a.

⁴ Ṭhumvâwr chu Kohath sûngkuohai chungah a tla a, chuongchun, thiempu Aron thla Levi chihai chun Juda hnam chanpuola mi dâm, Simeon hnam chanpuola mi dâm, Benjamin hnam chanpuola mi dâm khawpui sâwmpathum ṭhumvâwrin an chang ve a.

⁵ Kohath sûngkuo danghai chun Ephraim hnam thlahai chanpuola mi dâm, Dan hnam chanpuola mi dâm, Manasse hnam zâtve chanpuola mi dâm khawpui sâwm ṭhumvâwrin an chang ve ta a.

⁶ Gerson thlahai chun Issakar hnam thlahai chanpuola mi dâm, Basan rama Manasse hnam zâtve chanpuola mi dâm khawpui sâwmpathum ṭhumvâwrin an chang ve ta a.

⁷ Merari thlahai chun an sûngkuo izir ang peiin Reuben hnam chanpuola mi dâm, Gad hnam chanpuola mi dâm, Zebulun hnam chanpuola mi dâm khawpui sâwmpahni an chang ve a.

⁸ Israel thlahai chun Lalpain Mosie hmanga thu a pêk ang khan chu khawpuihai le a khaw kâwlvêlhai chu ṭhumvâwrin Levi chihai an pêk a.

⁹ Juda thlahai hnam chanpuola mi dâm, Simeon thlahai hnam chanpuola mi dâm, chu an pêk a, hieng khawpui an hming hitaka hrilhai hi;

¹⁰ Chuonghai chu Levi chihai laia mi, Kohath sungkuo laia pakhat, Aron nauhai chunga ṭhum vâwr tla hmasatak a nih.

¹¹ Chun, Juda tlâng rama Kiriatharba (chu chu Hebron) le a khaw kâwlvêlhai chu an pêk a. Arba chu Anak pa a nih.

¹² Khawpui sîrvêl le a khuo chînhai chu Jephunne naupa Kaleb ta dingin a chanpuolah an pêk a.

¹³ Chun, thiempu Aron thlahai chu Hebron, mi thattuhai inhumhimna khawpui le, a khaw kâwlvêlhai, Libna le a khaw kâwlvêlhai,

¹⁴ Jattir le a khaw kâwlvêlhai, Estemoa le a khaw kâwlvêlhai,

¹⁵ Holon le a khaw kâwlvêlhai, Debir le a khaw kâwlvêlhai leh,

¹⁶ Ain le a khaw kâwlvêlhai, Jutta le a khaw kâwlvêlhai, Bethsemes le a khaw kâwlvêlhai leh; chuong hnam hnihai chanpuola inthawka khawpui pakuohai chu an pêk a.

¹⁷ Chun, Benjamin hnam chanpuola mi chu Gibeon le a khaw kâwlvêlhai, Geba le a khaw kâwlvêlhai,

¹⁸ Anathoth le a khaw kâwlvêlhai, Almon le a khaw kâwlvêlhai leh, khawpui pali an pêk bawk a.

¹⁹ Aron thla thiempuhai khawpui po po chu sâwmpathum a nih, a khaw kâwlvêlhai leh.

²⁰ Levi chi Kohath thlahai sûngkuo, Kohath thla danghai khawma an chanpuol khawpuihai chu Ephraim hnam chanpuola mi kha a nih an nei chu.

²¹ Mi thattuhai inhumhimna khawpui Ephraim tlâng rama Sekem chu a khaw kâwlvêlhai leh, Gezer le a khaw kâwlvêlhai,

²² Kibzaim le a khaw kâwlvêlhai, Beth-horon le a khaw kâwlvêlhai leh khawpui pali an pêk a.

²³ Dan chanpuola mi Elteke le a khaw kâwlvêlhai, Gibbethon le a khaw kâwlvêlhai,

²⁴ Aijalon le a khaw kâwlvêlhai, Gath-rimmon le a khaw kâwlvêlhai leh, khawpui pali;

²⁵ Manasse hnam zâtvehai chanpuola mi Ta-anak le a khaw kâwlvêlhai, Gath-rimmon le a khaw kâwlvêlhai leh, khawpui pahni.

²⁶ Kohath thla danghai hnam khawpui po po chu khaw sâwm a nih, a khaw kâwlvêla a ran tlatna hmunhai leh.

²⁷ Levi chia mi Gerson hnamhai chu Manasse hnam zâtvehai chanpuola mi, mi thattuhai inhumhimna khawpui, Basan rama Golan chu a khaw kâwlvêlhai leh, Be-estera le a khaw kâwlvêlhai leh, khawpui pahni an pêk a.

²⁸ Issakar hnam chanpuola mi Kison le a khaw kâwlvêlhai, Daberath le a khaw kâwlvêlhai,

²⁹ Jarmuth le a khaw kâwlvêlhai, En-gannim le a khaw kâwlvêlhai leh; khawpui pali;

³⁰ Aser hnam chanpuola mi Misal le a khaw kâwlvêlhai, Abdon le a khaw kâwlvêlhai,

³¹ Helkath le a khaw kâwlvêlhai, Rehob le a khaw kâwlvêlhai leh, khawpui pali;

³² Naphtali hnam chanpuola mi, mi thattuhai inhumhimna khawpui Galili rama Kadesh chu a khaw kâwlvêlhai leh, Hamoth-dor le a khaw kâwlvêlhai, Kartan le a khaw kâwlvêlhai leh, khawpui pathum;

³³ Gersonhai chu an sûngkuo izir ang peiin an chanpuol khawpui po po chu khawpui sâwmpathum a nih, a khaw kâwlvêlhai leh.

³⁴ Levi chi, Merari sûngkuo ta dinga an pêk po chu Zebulun hnam chanpuola inthawkin Jokneam le a kâwlvêla ran tlatna hmunhai, Karta le a khaw kâwlvêla ran tlatna hmunhai leh;

³⁵ Dimna le a khaw kâwlvêlhai, Nahalal le a khaw kâwlvêlhai leh, khawpui pali;

³⁶ Reuben hnam chanpuola mi Bezer le a khaw kâwlvêlhai, Jahaz le a khaw kâwlvêlhai,

³⁷ Kedemoth le a khaw kâwlvêlhai, Mephaath le a khaw kâwlvêlhai leh, khawpui pali,

³⁸ Gad hnam chanpuola mi, mi thattuhai inhumhimna khawpui, Gilead rama Ramoth, a khaw kâwlvêlhai Mahanaim a khaw kâwlvêlhai leh,

³⁹ Hesbon a khaw kâwlvêlhai leh, Jazer le a khaw kâwlvêlhai, a rêngin khawpui pali.

⁴⁰ Chuong po po chu Levi chia chanpuol la chang ve lo Merari sûngkuo chan dinga khawpui an pêk po chu an nih; a rêngin khawpui sâwmpahni a nih.

⁴¹ Israel thlahai chanpuola mi Levi chihai khawpui po po chu khawpui sâwmli le pariet a nih, a khaw kâwlvêlhai leh.

⁴² Chuong khawpuihai chun khaw kâwlvêl a nei seng a, chuong khawpui po po chu chuong ang vawng chu an nih.

Israelin Ram chu a nei

⁴³ Chuongchun, Lalpain an thlatuhai kuoma inkhâma pêk a lo tiem tah chuong ram po po chu Israelhai chu a pêk a; chuongchun, ram chu an hluo a, a sûngah an chêng ta a.

⁴⁴ Chun, Lalpain an thlatuhai kuoma inkhâma a lo tiem ta ang ngei khan hmun tinah muongna a pêk a, an hmêlmahai po po chu tukhawm an hmaa ṭhang thei an um naw a;

⁴⁵ Lalpain Israel sûnghai kuomah a ṭha tieng thu a lo hril ta hrim kha a thlâwn hrim hrim a um naw a, a hung tlung vawng a nih.