JEREMIA 28 - Pathien Lekhabu Inthieng (BSI)

Hanania hrillâwkna indik naw

¹ Chun, Juda ram lal Zedekia rorêl ṭantir, a kum lina, a thla ngana, chu kum ma chun zâwlnei Azzur naupa Hanania, Gibeon mi chun, mipuihai po po le thiempuhai hmaihmaah, Lalpa ina chun ka kuomah hieng hin thu a hril a,

² “Israel Pathien sipaihai Lalpa chun hienghin a tih: Babulon lal rîngkawl chu ka sukthliek ta a.

³ Kum hni pumhlûm sûngin Lalpa ina bûr le bêlhai po po Babulon lal Nebukadnezzarin hi hmuna inthawka a lâk a, Babulona a phurhai kha hi hmuna hin hung la kîr nâwk vawng ka ta;

⁴ hi hmuna hin Juda ram lal Jehoiakim naupa Jekonia le Juda sal intânghai po po Babulona fe tahai chu hung ṭhuoi kîr nâwk ka ta; Lalpa chun a tih; Babulon lal rîngkawl chu ka sukthliek ding a ni si a,” tiin.

⁵ Chun, thiempuhai, mipui po po Lalpa ina ngîrhai kuoma chun zâwlnei Jeremia chun zâwlnei Hanania kuomah,

⁶ zâwlnei Jeremia ngei chun a hril a, “Amen: Lalpa chun chuong chun thaw raw se; Babulona inthawka hi hmuna, sala lo intânghai po po le, Lalpa ina bûr le bêlhai chu hung la kîr dingin, i thuhril chu Lalpa chun thaw raw se.

⁷ Nisienlakhawm, mipui po po na hrieta le nangma na hriet ngeia hi thu ka hril hi tuhin lo ngai ta;

⁸ Zâwlnei keia hma le nangma hmaa, kha hmaa lo um tahai khan ram tamtak chunga le, lalram ropuitakhai chunga le, indo thu dâm, thil ṭha naw thu dâm, hripui thu dâm an lo hril hlak a.

⁹ Zâwlnei thlamuongna thu hriltu chu, chu zâwlnei thuhril chu a hung tlung pha chun, chu zâwlnei chu Lalpa chun ama chu a tir taktak a nih ti hriet a nih,” tiin.

¹⁰ Chun, zâwlnei Hanania chun zâwlnei Jeremia rînga rîngkawl chu a lâk a, a sukthliek ta a.

¹¹ Chun, Hanania chun mipuihai po po hmaihmaa chun thu a hril ta a, “Lalpa chun hieng hin a tih: Hnam po pohai rînga inthawkin kum hni pumhlûm sûngin Babulon lal Nebukadnezzar rîngkawl chu hieng ang ngei hin ka sukthliek ding a nih, a tih,” a ta, zâwlnei Jeremia ruok chu a fe hmang ta a.

¹² Chun, zâwlnei Hananiain zâwlnei Jeremia rînga inthawka rîngkawl a sukthliek hnung chun Jeremia kuoma chun Lalpa thu chu hieng ang hin a hung tlung a,

¹³ “Fe la, Hanania chu hieng ang hin va hril rawh: Lalpa chun hienghin a tih: Thinga siem rîngkawlhai chu i sukthliek a; amiruokchu, an aia chun thîrin rîngkawl i siem ding a nih.

¹⁴ Israel Pathien, sipaihai Lalpa chun hieng hin a tih: Babulon lal Nebukadnezzar rawng chu an bâwl theina dingin hieng hnam po pohai rînga hin thîr rîngkawl chu kân kawltir tah a nih; ama rawng chu bâwl an ta, ramhnuoia ram sahai chenin ama chu ka pêk tah a nih,” tiin.

¹⁵ Chun, zâwlnei Jeremia chun zâwlnei Hanania kuoma chun, “Hanania, tuhin lo ngai ta, Lalpa chun nang a tir naw che a, nisienlakhawm, hi mipui hi khêlthu chu în ringtir a ni hi.

¹⁶ Chuleiin, Lalpa chun hieng hin a tih: Ngai ta, leihnuoi chunga inthawk hin ka tir hmang ding che a nih; Lalpa kala khêlthu i hril leiin, tu kum hin i thi ding a nih,” tiin.

¹⁷ Chuongchun, zâwlnei Hanania chu chu kum ma thla sarinaa chun a thi ta a.