ISAI 57 - Pathien Lekhabu Inthieng (BSI)

¹ Mi fel chu an bohmang hlak a, tukhawma an lungrilin an ngaituo ngai naw a, Pathien ngaisak mihai khawm lâk hmangin an um hlak a; mi fel chu thil ṭha lo hung tlung dinga inthawka lâk hmang an ni hlak ti tukhawma an ngaituo bawk naw a.

² Lungmuongnaa chun an lût hlak a; an khumahai chun an zâl sâwldam hlak, indiktaka fe taphawthai chu.

³ Nisienlakhawm, nangni dawithiemnu naupasal, uire le nawchizawr thlahai, hitaka hin hung hnai ro.

⁴ Tu am nuiza siemna dingin in hmang hlak a? Tu am in hner in phen khum a, in lei in thlâk khum hlak a? Bawsietna nau, khêlinhlipna thlahai ni lo am in nih?

⁵ Nangni thingsaisuo laia, thing buk hnuoi tina insukthafâna, ruom sûnghaia lung kak bula dâm naupang thattuhai.

⁶ Vadung ruom lung innâm lai chun i chanvo a um a; chuong, chuonghai ngei chu; i chanpuol chu a nih, chuonghai ta ding ngei chun thil inhlân dâwn mi i buok a, thilpêk khawm în hlân kha. Chuong thila chun suklungawiin ka um ding am a nih?

⁷ Tlâng insâng inzotak chunga chun i khum chu i sie a, chutaka bawk chun inthâwina inhlân dingin i fe hlak.

⁸ Kawtkhârhai le kawtkhâr bieng phênahai chun i hriet zingnahai chu în tung a, keia kuomah ni lovin, mi dang kuomah în hlîp a, i hang fe si a; i khum i zau a, an kuomah thu i thlung a; an khum chu i hmûnaa chun i hmangai a, an saruokna chu i en a.

⁹ Chun, hriek leh lal kuomah i fe a, i riminhnikhai chu i thaw nasa zuol a, i palaihai chu hlatakah i tir a, Seol tlung rakin în sukhnuoi kha.

¹⁰ I fena lampui hlat leiin i sâwl a, nisienlakhawm, “Beiseina hrim hrim a um nawh,” i ti si naw a; i hrâtna sukharna i hmu a; chuleiin, i châu ta naw kha.

¹¹ Tu am i ṭi a, în lau a, khêl i hril hlak a, kei i mi hriet ta naw a, i lungrila i ngaituo ta naw hi? Sâwttak ka to zing an nâwm a nih? Ṭi khawm i mi ṭi naw hi.

¹² I felna thu hi hril ka ta, i thilthawhai chu i ta dingin ienga ṭhahnem ni naw nih.

¹³ I khêk pha chun i lâk khâwmhai chun sanhim raw se che; nisienlakhawm, anni rawi chu thliin lâng a ta, thuokin lên hmang vawng a tih; kei mi ringtu ruok chun ram hi nei a ta, ka tlâng inthieng hi hluong a tih.

¹⁴ Chun, ama chun, “Sung pâwng ro, sung pâwng ro, lampui buotsai ro, ka mihai lampuia an tlûkna ding chu pei ro,” tîng a tih.

Pathien ṭhangpuina le a sukdamna

¹⁵ Mi chunghnung, chawisâng, chatuona um, a hming inthieng chun hieng ang hin a ti si a; “Kei hmun chunghnung le inthiengah ka um a, mi thuhnuoirawlhai lungril sukhar ding le insîr ngawi ngawihai lungril sukhar dingin mi lungrila insîr ngawi ngawia thuhnuoirawltak kuoma khawm ka um a nih.

¹⁶ Kumkhuoin ka do âwm si naw a, lunginsen rawp bawk naw ning ah; chuong naw chun, mi lungril ka hmaah châu a ta, hringna ka siemhai khawm chu châu bawk an tih.

¹⁷ A duâm khawhlona leiin ka lunginsen a, ka vuok a, ka hmai ka hip a, ka lung a sen a nih; ama hlak chu a lungril um dân pângngaihaiah kâwmâwtakin a um pei a.

¹⁸ A um dânhai chu ka hmu a, ama chu sukdam ka tih; ṭhuoi bawk ka ta, ama le a sûnpuituhai kuomah lungmuongnahai pe nâwk ka tih.

¹⁹ Kei chun hmûrhai ra ka siem hlak a, ‘Inremna, inremna, hlataka um kuoma le hnaitaka um kuoma chun um raw se,’Lalpain a tih, ama chu sukdam ka tih.

²⁰ Mi rilohai ruok chu tuipui infâwn infâwn hlakhai ang chu an na; an um ṭawk ṭawk thei si naw a, a tuihai chun hmunhnawk le chirhak a vawr suok hlak,” tiin.

²¹ Ka Pathien chun, “Mi rilohai ta ding chun lungmuongna hrim hrim a um nawh,” a tih.