INṬANNA 11 - Pathien Lekhabu Inthieng (BSI)

Babel In sâng thu

¹ Chun, hnuoia mi po po chu ṭawng hmunkhat le thu hril dân hmunkhat an ni vawng a.

² Chun, hieng hi a na, khawsak tienga an insawn pei lai chun Sinar ramah phaizâwl an hmu a; chutaka chun umhmun an khuor ta a.

³ “Thaw ro, ṭêklei siem ei ta, ṭhatakin râwng ei tiu,” an inti tâwl a. Chuongchun, lung aiah ṭêklei chu an siem a, lungchârna aiah lawngchârna an nei bawk a.

⁴ Chun, “Thaw ro, khawpui siem ei ta, in insâng a sîpin vân tawng dingin bâwl bawk ei tiu a, ei hming sukthang ei tiu; chuong naw chun hnuoi chung po poa hin sukdarin um râwi ei tih,” an in ti a.

⁵ Chun, Lalpa chu mihriem nauhaiin khawpui le in insâng an siem vêl chu en dingin a zu ṭum a.

⁶ Chun, Lalpa chun, “Ngai ta u, mihai hi pumkhat an ni a, an rêngin ṭawng hmunkhat an nei bawk si a; hi thil an thaw phut a ni hi; tuhin chu an thilthaw tum hrim hrim hi khappêk ruol ni ta naw ni hai.

⁷ Thaw ro, zu fêng ei tiu a, ṭawng an inhriettuo thei nawna dingin an ṭawng zu suktumpêk ei tiu,” a ta.

⁸ Chuongchun, Lalpain anni chu chutaka inthawk chun hnuoi chung po poa chun a sukdar ta a; chuongchun, an khaw siem khawm chu an tâwpsan ta a.

⁹ Chuleichun, a hming chu Babel an ti a; Lalpain chutaka chun hnuoia mi po po ṭawng chu a suktumpêk ta leiin: chutaka inthawk chun Lalpain anni chu hnuoi chung po poa chun a sukdar ta bawk a.

Sem thlahai

¹⁰ Hienghai hi Sem thlahai chu an nih: Sem chu kum za mi a niin tui lêt hnung kum hni hnunga chun naupasal Arpaksad a nei a:

¹¹ Chun, Arpaksad a nei hnung chun Sem chu kum za nga a la dam a, naunuhmei le naupasalhai a nei nâwk a.

¹² Arpaksad chun kum sâwmthum le panga a niin naupasal Selah a nei a:

¹³ Selah a nei hnung chun Arpaksad chu kum za li le pathum a la dam a, naunuhmeihai le naupasalhai a nei nâwk a.

¹⁴ Selah chun kum sâwmthum a niin naupasal Eber a nei a:

¹⁵ Eber a nei hnung chun Selah chu kum za li le pathum a la dam a, naunuhmeihai le naupasalhai a nei nâwk a.

¹⁶ Eber chun kum sâwmthum le pali a niin naupasal Peleg a nei a:

¹⁷ Peleg a nei hnung chun Eber chu kum za li le sâwmthum a la dam a, naunuhmeihai le naupasalhai a nei nâwk a.

¹⁸ Peleg chun kum sâwmthum a niin naupasal Reu a nei a:

¹⁹ Reu a nei hnungin Peleg chu kum za hni le pakuo a la dam a, naunuhmeihai le naupasalhai a nei nâwk a.

²⁰ Reu chun kum sâwmthum le pahni a niin naupasal Serug a nei a:

²¹ Serug a nei hnungin Reu chu kum za hni le pasari a la dam a, naunuhmeihai le naupasalhai a nei nâwk a.

²² Serug chun kum sâwmthum a niin naupasal Nahor a nei a:

²³ Nahor a nei hnungin Serug chu kum za hni a la dam a, naunuhmeihai le naupasalhai a nei nâwk a.

²⁴ Nahor chun kum sâwmhni le pakuo a niin naupasal Tera a nei a:

²⁵ Tera a nei hnungin Nahor chu kum za khat le sâwm le pakuo a la dam a, naunuhmeihai le naupasalhai a nei nâwk a.

²⁶ Chun, Tera chun kum sâwmsari a niin naupasal Abram, Nahor le Haran a nei a.

Tera thlahai

²⁷ Chun, hienghai hi Tera thlahai chu an nih. Tera chun naupasal Abram, Nahor le Haran a nei a. Haran chun naupasal Lota a nei a.

²⁸ Haran chu a piengna rama Kaldaihai khuo Urah, a pa Tera hmaa chun a thi a.

²⁹ Chun, Abram le Nahor chun nuhmei an nei a; Abram nuhmei hming chu Sarai a ni a; Nahor nuhmei chu Haran naunu Milka a ni a, Milka chu Iska unaunu a nih.

³⁰ Chun, Sarai chu a ching a, nau hrim a nei naw a.

³¹ Tera chun a naupa Abram le, a naupa naupasal (Haran naupa) Lota le, a mo, a naupa Abram nuhmei Sarai chu a ṭhuoi a; Kanaana fe dingin Kaldaihai khuo Ura inthawk chun an suok tlâng ta a; nisienlakhawm, Haran an hung tlung a, chutaka chun umhmun an khuor ta a.

³² Tera dam sûng chu kum za hni le panga a nih; chun, Tera chu Harana chun a thi ta a.