INPÂKNA HLABU 99 - Pathien Lekhabu Inthieng (BSI)Israel ta dinga Lalpa ringumna 1 Lalpa chu lalah a ṭhung a, mi tin chu inthin raw se, Ama chu cherubhai chungah a ṭhung a, hnuoi hi inhnîng raw se. 2 Lalpa chu Zion khaw sûnga chun ropuitak a na, Mi tinrênghai chunga chun a chunghnung dai a nih. 3 Anni chun i hming ropuitak, ṭîumtak chu inpâk raw se, Ama chu ân thieng a nih. 4 Laltak hrâtna chun rorêlna a ngaina a, Nang chun thlierbîk nei nawna i sukdet hlak a, Nang chun Jakobrawihai chungah ro i rêl a, feltakin i thaw hlak a. 5 Lalpa ei Pathien chu chawimawi unla, A ke innghatna bula chun chibai bûk ro, Ama chu ân thieng a nih. 6 A thiempuhai lai chun Mosie le Aron, A hming lamtuhai laia chun Samuel, Anni chun Lalpa chu an ko a, ama chun a dawn ta a. 7 Sûm ngîra chun an kuomah thu a hril a, A thuinhriettirhai le thuruot a pêk chu an zâwm a. 8 Aw Lalpa, kan Pathien, nang chun anni chu i dawn a, Nang chu anni ngaidamtu Pathien i nih, An thilthaw chungahai phuba la hlak la khawm. 9 Lalpa ei Pathien chu chawimawi unla, A tlâng inthienga chun chibai bûk ro; Lalpa ei Pathien chu ân thieng si a. |
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
Bible Society of India