INPÂKNA HLABU 9 - Pathien Lekhabu Inthieng (BSI)

Pathien indikna leia lâwmthu hrilna

Hla ṭhuoitu ta dingin: Muth-labben le sak ding. David Inpâkna Hla.

¹ Lalpa, kuoma chun ka lungril po poin lâwmthu hril ka ta, I thilmak thaw po po chu inhriettir ka tih.

² Nangmaa chun lâwmin hlim ka ta; Aw nang Achunghnungtak, i hming inpâkin hla sak ka tih.

³ A mi dotuhai chu an tlânse phingleh, I hmaa chun an insui a, an bohmang tah a nih.

⁴ Ka ta dinga âwm hrima le ka thua hin nangin i mi ṭan si a; Feltaka ro rêlin lalṭhungphaa chun i ṭhung a.

⁵ Hnam tin chu i hal a, mi rilohai chu i sukbohmang a, An hming chu kumkhawtluonga dingin i thai hmang ta a.

⁶ Dotuhai chu an beidawng zo a, kumkhuoa dingin mâkin an um tah. I khuo sukrêmtahai chu; Anni hriet zingna pumin a bohmang ta bawk a.

⁷ Lalpa ruok chu kumkhuoa dingin lalah a ṭhung a, A lalṭhungpha chu rorêlna dingin a buotsai tah.

⁸ Ama chun khawvêl hi feltakin ro rêlpêk a ta, Thlierbîk nei lovin mi tin ro chu rêlpêk a tih.

⁹ Chuongchun, Lalpa chu nêksâwra umhai ta ding chun kulbîng insâng nîng a ta. Lunginzîng huna chun kulbîng insâng lo nîng a tih.

¹⁰ Chuongchun, i hming hretuhai chun ring an ti che a, Nang chun chu, Lalpa, nangma zawngtuhai che chu i mâksan ngai si naw a,

¹¹ Lalpa, Ziona um chu inpâkin hla sak unla, Mihai lai chun a thilthawhai chu hril ro.

¹² Thisen insuo suosal hlaktu chun anni chu a hriet zing hlak si a, Mi rimsihai khêkri a theinghil ngai nawh.

¹³ Aw Lalpa, mi lunginsiet la, A mi theidatuhai leia ka lunginzîngna hi en ta, Nang thina kawtkhâra inthawka mi sansuok hlaktu;

¹⁴ Nangma inpâkna po po chu kân hriettir theina dingin; Zion naunu kawtkhârahai chun, I mi sandamnaa hin hlim ka tih.

¹⁵ Hnam tin chu an khur siemahai chun an tlum a, An lên pha rûka chun anni ke ngei a âwk ta a.

¹⁶ Lalpa chun ân hriettir a, rorêlna chu a tirsuok ta a, Mi rilo chu ama kutsuok ngeia chun a âwk hlak.

¹⁷ Mi rilohai chu Seola chun kîr nâwk an ta, Hnam tin Pathien theinghil hmang hlakhai chu.

¹⁸ Pasiehai chu theinghilin um zing zing naw ni hai a, Rimsihai beiseina chu kumkhuo chun bo sawng bawk naw ni.

¹⁹ Aw Lalpa, tho la, mihriem el chun ngam naw raw se, Hnam tin chu i mithmuah ro rêlpêkin um raw se.

²⁰ Aw Lalpa, anni chu sukṭi la, Hnam tin chun mihriem el an nih ti inhre raw se.