Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

INPÂKNA HLABU 86 - Pathien Lekhabu Inthieng (BSI)


Pathienin a zângaina sunzawm dinga ngênna
David ṭawngṭâina

1 Aw Lalpa keia tieng hin i na hung sit la, mi hung dawn rawh, Rimsi le pasetak ka ni hi.

2 Ka hringna hi vawngṭha la, Pathien ngaisak mi ka ni si a, Aw, nang ka Pathien, nangma ringtu i siehlaw hi, sandam rawh.

3 Aw Lalpa, mi lunginsiet la, Sûnnithlâkin ka ko hlak si che a,

4 I siehlaw hringna hi sukhlim la, Aw Lalpa, ka lungril hi i kuomah ka sie tlat hlak si a.

5 Lalpa, nang chu i ṭha a, ngaidam i pei a, A kotuhai che phawt kuomah zainêmna i hau si a.

6 Aw Lalpa, ka ṭawngṭainaa hin na lo sit la, Lunginsiet ka hnina râwl hi lo ngai rawh.

7 Ka lunginzîng ni chun ko ka ti che a, Nangin i mi dawn ding a ni si a.

8 Aw Lalpa, pathienhai lai chun nang ang hrim hrim an um naw a, I thilthawhai ang hi thilthaw hrim hrim a um bawk nawh.

9 Aw Lalpa, i siem hnam tinrênghai chu hung an ta, i hmaah hung kûn an ta, I hming chu hung chawimawi an tih.

10 Nang chu i ropui a, thilmakhai i thaw bawk hlak si a, Nangma chau hi Pathien i nih.

11 Aw Lalpa, i lampui chu mîn chûktir la, i thutaka chun um ka tih, I hming ṭi dingin lungril sakhat mîn puttir rawh.

12 Aw Lalpa ka Pathien, ka lungril po poin inpâk ka ti che a, I hming hi kumkhuoin chawimawi ka tih.

13 Ka chunga i ngilneina chu a nasain; Ka hringna hi khursûng hnuoihnungtaka inthawkin i sanhim si a.

14 Aw Pathien, mi chapohai chun an mi thaw a, Mi nunse um khâwmhai chun ka hringna hi sukbo tumin an zawng a, Nang chu an hmaah an sie ngai naw che.

15 Nisienlakhawm, aw Lalpa, nang chu Pathien, lainatnaa sip, mi lunginsietthei, Lunginuoi, zainêm le thutak hau i nih.

16 Aw keia tieng hung ngha la, mi lunginsiet rawh. I siehlaw kuoma hin i hrâtna pe la, I suoknu nau hi sandam rawh.

17 Ṭhatna ding inchikna mîn entir la, A mi theidatuhai chun chu chu an hmu a an muolphona dingin; Lalpa nangin i mi ṭhangpuia i mi thlamuon leiin.

Hmar OV (Re-edited) Bible (Millennium) - Pathien Lekhabu Inthieng 

Copyright © Bible Society of India, 2016.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ