INPÂKNA HLABU 83 - Pathien Lekhabu Inthieng (BSI)

Israel hmêlmahai sietna dinga ṭawngṭâina

Asaph Inpâkna Hla. Hla

¹ Aw Pathien, ṭawng lovin um naw la, Aw Pathien, to zing naw la, um ṭawk ṭawk lul naw rawh.

² Ngai ta, nangma dotuhai chu an sa mur mur a; Nangma theidatuhai chu an lu an suksâng a,

³ I mihai vervêktakin an phierrûk a, I mi thuphmanghai chunga hin a se tiengin an inrâwn a.

⁴ “Thaw ro, an hnam bo khawpin sukbohmang ei tiu, Israelhai hming hrim hrim hi hriet zinga a um ta nawna dingin,” an ta,

⁵ Inthuruolin an inrâwn a, I chungah a se tienga thaw dingin thu an intiem tâwl a.

⁶ Edomhai le Ismaelhai puon in dâm, Moabhai le Hagarhai dâm,

⁷ Gebalhai le Ammonhai le Amalekhai dâm, Philistinhai, Tura khuoa umhai leh.

⁸ Assuriahai khawm anni tieng an ṭhang ve a, Lota thlahai chu an ṭhangpui a,

⁹ Annirawi chu Midianhai chunga i thaw ang dâm, Kison vadunga Sisera chunga i thaw ang dâm, Jabin chunga i thaw ang khan thaw ve rawh.

¹⁰ Chuong mihai chu Endor khuoah an bohmang a, Hnuoi dingin êkdûr ang el an lo ni ta kha.

¹¹ An mi lienhai chu Oreb le Zeeb i thaw ang khan thaw la, Anih, an lalhai po po chu Zeba le Zalmunna ang khan tukdei rawh.

¹² Chuong mihai chun, “Pathien umnahai chu, Hluopêk ei tiu,” an ti kha.

¹³ Aw ka Pathien, anni chu pilvut khu chum chum ang hin the dar la, Businâwi thli imût lêng ur ur ang el hin.

¹⁴ Ram kângtu mei ang le, Tlâng kângtu meichawk ang elin;

¹⁵ Anni chu i thlipuiin hnawt la, I thli natak chun sukṭi rawh.

¹⁶ Aw Lalpa, i hming an zawng theina dingin, An hmêl chu inzaknain suksip rawh.

¹⁷ Kumkhuoin, muolpho le lunginzîngtakin um hai sienla, Anih, sukzaka umin bohmang raw se.

¹⁸ Nangma chau hi JEHOVAH hming put, Hnuoi chung po poa Achunghnungtak i nih ti an hriet theina dingin.