INPÂKNA HLABU 81 - Pathien Lekhabu Inthieng (BSI)

Pathien ṭhatna le Israel ringum nawna

Hla ṭhuoitu ta dingin: Gittitha sak ding. Asaph Inpâkna Hla.

¹ Pathien a mi sukhrâttu chawimawiin hlimtakin hla sak unla, Jakob Pathien chawimawiin hlimtakin khêk ro.

² Inpâkna hla sak unla, khuongtê dâm, Ṭingṭang ngainuomumtak dâm, perkhuong dâm leh hung chawi ro,

³ Thla thara chun tawtawrâwt mût unla, Thla lir laia ei ruoiṭhe hun lai leh.

⁴ Israelhai ta dinga thuruot a ni si a, Jakob Pathien dân a nih.

⁵ Chu chu Josef-a chun thu inhriettirna dingin a ruot a, Aigupta rama a fe thleng lai khan; Ka ṭawng hriet naw râwl ka hriet a

⁶ An liengko chu thil rika inthawkin ka lâk hmang a, An kuthai chu leikhâwra inthawka inthlain a um kha.

⁷ Lunginzîngin in mi ko a, ka sanhim cheu a, Vâninrûm inbîkhmangna hmuna khan ka dawn cheu a; Meriba tuia khan kân fie cheu kha.

⁸ Aw ka mihai, ngai unla, inhriettir ka ti cheu, Aw Israelhai, ka thu ngai ta ve unla chu aw!

⁹ Ram dang pathien hrim hrim in lai an um ding a ni naw a, Mi dang pathien hrim hrim chu in biek ding a ni bawk nawh.

¹⁰ Kei Lalpa in Pathien chu ka nih; Aigupta rama inthawka ṭhuoi suoktu cheu kha. In bau ka lien unla, ka suksip ding annâwm.

¹¹ Nisienlakhawm, ka mihai chun ka râwl an ngai si naw a; Israelhai chun an mi dit naw kha.

¹² Chuongchun, an lungril kâwmaw ang peia um dingin ka thlathlam a, Anni remruot anga an umna dingin.

¹³ Aw, ka mihai hin ka thu ngaiin, Israelhai hi ka lampuia hin fe hai sien chu aw!

¹⁴ An hmêlmahai chu ka suktlâwm vakin, Anni dotuhai chunga chun ka kut kân let ding bah.

¹⁵ Lalpa theidatuhai chu a hmaah ṭiin kûn an tih, An hrem tuorna chun kumkhuo dai a tih..

¹⁶ Nangni chu bu ṭhatakin châwm ka ti cheu a, Lungpuia khuoizuin ka sukkhawp ding cheu a nih.