INPÂKNA HLABU 80 - Pathien Lekhabu Inthieng (BSI)

Israelhai tungding nâwkna dinga ngênna

Hla ṭhuoitu ta dingin: Sosanim-Edutha sak ding. Asaph Inpâkna Hla.

¹ Aw Israelhai vêngtu, Berâm pâwl anga Josefhai ṭhuoitu, na lo sit raw aw; Nang cherubhai chunga ṭhung chu, hung var suok rawh.

² Ephraimhai le, Benjaminhai le, Manassehai mithmua chun i hrâtna kha chawktho la, Keini mi sandam dingin hung rawh.

³ Aw Pathien, mîn nghatkîrtir nâwk la; I hmêl kha sukvar la; chuongchun, sandamin um kan tih.

⁴ Aw Lalpa, sipaihai Pathien, Ieng chen am i mihai ṭawngṭâina chunga hin i lunginsen ding a na?

⁵ Anni chu mitthli beiin i châwm a, Mitthli hi dâwn dingin inkhina lientakin i pêk hlak.

⁶ Nangin kan vêla mihai ta dinga insêlnaah i mi siem hlak a, A mi dotuhai chu an innui tâwl hlak.

⁷ Aw sipaihai Pathien, mîn nghatkîrtir nâwk la, I hmêl kha sukvar la, chuongchun, sandamin kan um ding annâwm.

⁸ Aigupta rama inthawka grêphrui i hung lâk a, Hnam tin chu i hnawt dawk a, i phun ta a;

⁹ A hma i sukfai pei a, Inthûktakin zung a kei a, ram chu a aw ta vawng a.

¹⁰ Tlânghai chu a hlim tuomin an um tâwl a, A kâuhai chu Pathien sidar thinghai ang el a nih,

¹¹ A kâuhai chu tuisuoriet chenin ân zâm suoktir a, A dâwn inderhai chu Vadungpui chenin.

¹² Iengdinga a palhai chu i suksiet am a na? Lama fe taphawtin an kei thlâk ta hi.

¹³ Ramhnuoia sanghal chun a suksiet a, Ram sahai khawmin an tlân hlak.

¹⁴ Aw sipaihai Pathien, lunginsiettakin nghakîr nâwk ta; Vâna inthawk khan zuk en la, hi grêp hrui hi en la, hung kan rawh.

¹⁵ A kûng i kut changtiengin a phun le, A kâu i ta dinga i sukhrât le hin.

¹⁶ Meiah a kâng ta a, phûrin a um ta a; I hmêla halna leiin an bohmang hlak.

¹⁷ I kut kha i ditsak mi chungah um raw se, Mihriem naupa i ta dinga i sukhrât chunga hin.

¹⁸ Chuongchun, kîr san naw ning ung che a, Mi sukhar la; chuongchun, i hming lam kan tih.

¹⁹ Aw Lalpa, sipaihai Pathien, mîn nghatkîrtir nâwk la. I hmêl kha sukvar la, chuongchun, sandamin um kan tih.