INPÂKNA HLABU 78 - Pathien Lekhabu Inthieng (BSI)

A mi ringum nawhai chunga Pathien ringumna

Asaph Maskil.

¹ Aw ka mihai, ka dân thua hin na lo sit unla, Ka baua thuhaiah in na hung daw ro.

² Tekhithuin ka bau kâng ka ta, Tiena thu ril hril tahai kha hril suok ka tih.

³ Chuong chu ei nain ei hriet a, ei lungrilin ei hriet bawk a, Ei thlatuhai khawmin an mi hril bawk kha.

⁴ Chuong chu an nauhai kuomah ip nâwm ei ni a Ruolthar hung dinghai kuoma Lalpa inpâkna thu le, A hrâtzie le a thilmaktak thawzie chu hril lem ei tih.

⁵ Jakobhai laiah thuinhriettir a sukdet a; Israelhai lai dân a ruot a, Chuong chu ei thlatuhai kuomah thupêkin a pêk a; Anni chun chuong thu chu an nauhai kuomah an inhriettir dingin.

⁶ Ruolthar la hung um ding, naupang la hung pieng dinghai chun an hriet theina dingin; Chuonghai chu an tho a, an nauhai kuoma an la hrilsâwng peina dingin;

⁷ An beiseina chu Pathienah an innghat theia, Pathien thilthawhai chu an theinghil nawa, A thupêkhai chu an zâwm lemna dingin;

⁸ Le, an thlatuhai anga, Suon kâwmaw le hel hmang, Suon lungril siem diklo, Pathien kuoma lungril ringum naw puta an um nawna dingin.

⁹ Thalngula inthuoma Ephraim mihai chu, Indo ni chun an hnungkîr a.

¹⁰ Pathien thuthlung chu an zâwm naw a, A dâna um an nuom naw bawk a;

¹¹ A thilthawhai chu an theinghil a, A thilmak thaw ân hmutirhai khawm chu.

¹² An thlatuhai mithmuah thilmakhai a thaw hlak a, Aigupta rama Zoan phûla chun.

¹³ Tuisuoriet chu a sukṭhe phawk a, anni chu ân fe kâitir a, Tuihai chu iengkhat sie khâwm thûr angin ân ngîrtir nguou a.

¹⁴ Sûna chun sûmin a ṭhuoi a, Zânkhawvârin meichawkin a ṭhuoi bawk hlak a.

¹⁵ Thlalêra chun lungpuihai a sukkhawi bawk a, Tui inthûktaka inthawk ang el, ditkhawpa dâwn ding a pêk a.

¹⁶ Lungpuia inthawk chu vadunghai a suksuok a, Tuihai chu vadungpuihai ang elin ân luong thlâktir a.

¹⁷ Chuong sa khawma a chungah thil an la suksuol ta rawp a, Ram ṭâwla chun Achunghnungtak chunga chun an hel a.

¹⁸ An châkna sukre dinga fâk ding hniin, An lungrilin Pathien an fie a.

¹⁹ Anih, Pathien an hrilhnâwm a, “Thlalêra hin Pathienin dawkân a buotsai thei am chu?

²⁰ Ngai ta, lungpui chu a vuokin tuihai kha a hung inkhâw suokin, Vadunghai chu a kuong a liem pûr pûr ta luo a, Bu khawm a pêk thei nghâl am chu? A mihai ta ding hin sa a buotsai ding am chu?” an ti a.

²¹ Chuongchun, Lalpa chun a lo hriet a, a lung a sen ta a, Jakobhai chungah mei a hung chawk suok ta a, Israelhai chungah lunginsenna a hung ta a.

²² Pathien an ring naw a A sandamna khawm an ring naw leiin.

²³ Nisienlakhawm, chungtienga vân dumhai khi thu a pêk a. Vân kawtkhârhai khi a hawngpêk a.

²⁴ An fâk dingin manna kha an chungah a zuk insûrtir a, Vân bu chu an kuomah a pêk a nih.

²⁵ Mihriemhaiin mi hrâthai bu chu an fâk a, Khawpna khawpin bu a hung pêk a.

²⁶ Khaw sak thli chu vânah ân hrângtir a, A thilthawtheinain sim thli chu a ṭhuoi a.

²⁷ Sa chu pilvut zât rauin an chungah ân sûrtir a, Vatê thla nei chu tuipuihaia phaiphin zât rauin.

²⁸ An riekhmun laia chun ân tlâktir a, An umna bûk kâwl vêlahai chun.

²⁹ Chuongchun, an fâk a, an khawp hle a, An ichâk chu an kuomah a pêk tah a nih.

³⁰ An châk a la re naw a, An bu chu an bauah a la um a.

³¹ Chuong lai tak chun Pathien lunginsenna chu an chungah a tla a, An mi thâuhai ṭhenkhat a that a; Israel tlangvâlhai chu a vuok thlûk tâwl a.

³² Chuong sa khawmin thil an la suksuol ta rawp a, A thilmak thawhai chu an ring chuong nawh.

³³ Chuleiin, an dam sûng nihai chu teplo mei meiin a sukbo pêk a, An dam sûng kumhai chu ṭitnain a sukbo pêk bawk a.

³⁴ Anni a that poleh ama chu an zawng hlak a, An kîr nâwk a, zîngkâr Pathien an zawng hlak.

³⁵ Pathien chu an lungpui a nih ti le, Pathien Achunghnungtak chu an intlantu a nih ti an hriet suok hlak.

³⁶ Nisienlakhawm, ama chu an bauin an inpâk tehlêm a, An leiin a kuomah khêlthu an hril hlak.

³⁷ An lungril chu ama kuomah ân dik si naw a, A thuthlunga chun ring an um bawk nawh.

³⁸ Nisienlakhawm, ama chu lainatnaa a sip leiin an rîtlona chu a ngaidam a, anni chu a sukbohmang nawh; Anih, vawi tamtak a lunginsenna chu a lâk kîr a, A lunginsenna chu a rêngin a chawktho nuom ngai nawh.

³⁹ Tisa chau an nih ti a hriet zing a, Thli, lêt nâwk lo dinga hrâng liem hlak ang hi.

⁴⁰ Thlalêra khan a chungah an va hel inzingin, Ram ṭâwla khan ama chu an va suklungngai inzing de!

⁴¹ An ngha kîr nâwkin Pathien an fie a, Israelhai mi inthieng chu an suknuor hlak.

⁴² A kut chu an hriet zing naw a, Anni dotuhaia inthawka a sanhim ni chu an hriet zing ngai nawh.

⁴³ Khânga Aigupta ramah inchiknahai a sie a, Zoan phûlah thilmakhai a sie bawk a;

⁴⁴ An vadungpuihai chu thisenah ân changtir a, An vadunghai chu thisenah ân changtir bawk kha; chuongchun, an dâwn thei ta naw a.

⁴⁵ Anni lai tho tamtak a tir a; chuongchun, anni chu a fâk zo a, Uhai a tir bawk a, chuongchun, anni chu a sukbohmang ta a.

⁴⁶ An thil kakhai khawm chu tuktulung kuomah a pêk a, An sininrim ra chu khâuṭhikṭhi kuomah a pêk bawk a.

⁴⁷ An grêp hruihai chu rielin a sukhlum a, An theichang kûnghai khawm chu vûrin a sukhlum bawk a.

⁴⁸ An ranhai khawm chu riel kuomah a pêk a, An ranruolhai khawm chu ṭêk lumtak kuomah a pêk bawk.

⁴⁹ A lunginsenna nasatak chu an chungah a thlâk a, Lunginsenna dâm, lungdam nawna dâm, lunginzîngna nasatak dâm hi, Thil ṭha nawtak intluntu tirko pâwl chu.

⁵⁰ A lunginsenna ding chun lampui a siempêk a, An hringna chu thinaa inthawkin a humhim naw a, An hringna chu hri kuomah a pêk ta lem a.

⁵¹ Aigupta rama nau lutîr po po a sukhlum a, Ham puon inhaia an hrâtna ra hmasa takhai chu:

⁵² Nisienlakhawm, ama mihai chu berâm angin a ṭhuoisuok a, Ranruol angin thlalêra khan a ṭhuoi a.

⁵³ Himtakin a ṭhuoi a, chuongchun, iengkhawm an ṭi naw a, Nisienlakhawm, tuipui chun an hmêlmahai chu ân khum zo ta a,

⁵⁴ Chun, a hmun inthieng ramri chu a ṭhuoi tlung a, Hi tlâng a kut changtienga a închâwka hin.

⁵⁵ Hnam tin chu an hmaah a hnawt suok a, Anni chu hruia inkhi dingin rochanah a siem a. An puon ina chun Israel hnamhai chu ân umtir ta a.

⁵⁶ Nisienlakhawm, Pathien Achunghnungtak chu an infie a, a chungah an hel a, A thu inhhriettirhai chu an zâwm si naw a.

⁵⁷ Ngha kîrin, an thlatuhai angin vervêktakin an thaw ta lem a: Thalngul ringum naw angin an fe kâwi ta a;

⁵⁸ An hmun insânghaiin ama chu an suklungsen hlak si a, An milim siemhaiin an inthîktir bawk a.

⁵⁹ Pathienin chu chu a lo hrietin a lunginsen a, Israelhai chu a tirdak ta êm êm a.

⁶⁰ Chuongchun, Silo biekbûk, Mihriem laia a puon in sie chu, a mâksan a.

⁶¹ A hrâtna chu salah ân mantir a, A ropuina chu dotuhai kutah ân mantir ta bawk a.

⁶² A mihai chu kâwlhnâm kuomah a pêk a; A rochan chunga chun a lunginsen ta a.

⁶³ Meiin an tlangvâlhai chu a kânghmang a, An nunghâkhai chun inneina hla hrim hrim an nei ta naw a.

⁶⁴ An thiempuhai chu kâwlhnâma sukthlûkin an um a, An hmeithaihai chu ṭap hrim hrim an ṭap nawh.

⁶⁵ Chuong lai chun Lalpa chu,mi an in an har angin, a har ta a, Mi hrât uoin leia khêk ang hin.

⁶⁶ Ama dotuhai chu a vuok kîr a, Kumkhaw hmingsietna ân hlawtir ta a.

⁶⁷ Chu naw khawm chu Josef puon in chu a dit naw a, Ephraim hnam chu a thlang naw bawk a.

⁶⁸ Juda hnam chu a thlang ta lem a, A hmangai Zion tlâng chu.

⁶⁹ A in inthieng chu vân insânghai ang khin a bâwl a, Kumkhuoa dinga a suknghet leihnuoi ang hin.

⁷⁰ A siehlaw David chu a thlang a, Berâm huona inthawk dâm chun a lâk suok a,

⁷¹ Berâmpui te ṭhuoihaia inthawkin a ṭhuoi suok a, A mihai Jakobhai le Israelhai châwm dingin.

⁷² Chuongchun, ama chun a lungril ṭhatna ang peiin anni chu a châwm a, A kut thiemnain a ṭhuoi ta a.