INPÂKNA HLABU 76 - Pathien Lekhabu Inthieng (BSI)

Hnêna le rorêlna Pathien chu

Hla ṭhuoitu ta dingin ṭingṭang chi tum tuma sak mi. Asaph Inpâkna Hla. Hla.

¹ Judahai lai chun Pathien chu hrietin a um a, Israelhai lai chun a hming a ropui a nih.

² Salema chun a bâwktê chu a um a, Chun, ama umna chu Zionah a um a,

³ Chutaka chun thalngul thalhai chu a suksiet a, Phaw dâm, kâwlhnâm dâm, indona dâm leh.

⁴ Nang chu ropuitak le ṭhatak i na, sase tlânga inthawk chun

⁵ Pasalṭhahai chu rawkin an um a, An in chu an in sawng ta a; Mi hrât khawm tukhawmin an kut an inlet thei ta nawh.

⁶ Aw Jakob Pathien, i kâwkna leiin, Tawlailîr le sakawr khawm ininnghiltir dêrin an um vê ve a;

⁷ Nang, nangma ngei chu ṭi ding i nih, I lunginsen taphawt chun tu am i mithmuah ngîr thei an ta?

⁸ I rorêl thu chu vâna inthawkin în hriettir a, Hnuoi hin a ṭi a, a to ta a.

⁹ Hnuoia mi thuhnuoirawlhai po po sandam dinga, Pathien chu rorêl dinga a tho lai khan.

¹⁰ Matheilovin mihriem lunginsenna hin la hung inpâk ngei a ti che, Lunginsenna mahla chun inkhit i tih.

¹¹ Thu tiem unla, Lalpa in Pathien kuoma chun hlen ro, A vêla mi po po chun ṭidingpa chu lâwmmanhai hung chawipêk raw hai se.

¹² Ama chun rorêltuhai huoina chu sât bawng a ta, Ama chu hnuoia lalhai ta ding chun ṭi a um a nih.