INPÂKNA HLABU 72 - Pathien Lekhabu Inthieng (BSI)

Lal indik rorêlna

Solomon Inpâkna Hla.

¹ Aw Pathien, i rorêlnahai chu lal kuomah pe la, I felna chu lal naupa kuomah pe rawh.

² I mihai chu felnain ro rêlpêk a ta, I mi rimsihai chu rorêlna felin ro rêlpêk a tih.

³ Tlâng lien le tlâng chînhai hin felnain Mihai kuomah lungmuongna hung intlun an tih.

⁴ Ama chun mi laia rimsihai chu ro rêlpêk a ta, Pase nauhai chu sandam a ta, Nêksâwrtu ruok chu suknâwi a tih.

⁵ Nisa khi a um sûng phawt chu ṭîng an ti che a Thla um sûng po khawmin, suon um sûng po po chun.

⁶ Ama chu hlobet râwtna chunga ruotui tla angin tlâng a ta, Hnuoi châwmtu ruotui ang elin.

⁷ A dam lai chun mi felhai chu inno hlut hlut an ta, Thla um naw hma khat chun, lungmuongna nasatak um a tih.

⁸ Ama chun tuipui pakhata inthawka tuipui dang chenin ramawp nei a ta, Vadungpuia inthawka kâwlkawdawng chen khawmin.

⁹ Thlalêra umhai chu a hmaah kûn an ta, Ama dotuhai chun pilvut liek an tih.

¹⁰ Tarsis ram le thlierkâra lalhaiin lâwmman hung chawi an ta, Seba le Sheba ram lalhaiin thilpêk hung inhlân bawk an tih.

¹¹ Anih, lal po po chu a hmaah bawkkhup an ta, Hnam tinrêngin a rawng bâwl an tih.

¹² Pasiein a koin ama chun sanhim a ta, Mi rimsi ṭhangpuitu nei naw khawm chu sanhim a tih.

¹³ Mi rimsi le pasiehai chu lunginsiet a ta, Pasiehai hringna chu sandam a tih.

¹⁴ An hringna chu nêksâwrna le nunsietnaa inthawkin intlan a ta, An thisen chu ama ngai chun hlutak a ni ding a ni si a.

¹⁵ Chun, hring an ta, Sheba ram rângkachak chu a kuoma pêk nîng a tih, Mihaiin ama chu ṭawngṭâipêk rawp an ta, Sûnnithlâkin mal sâwmpêk an tih.

¹⁶ Hnuoiah, tlâng chungahai hin bu tamtak um a ta, A vui chu Lebanon angin inhnîng suou suou a ta, Khuoa mihai chu hnuoi hlobet angin inno hlut hlut an tih.

¹⁷ A hming chu kumkhawtluongin dei naw ni a. A hming chu ama a um sûng chu dei lovin um pei a ta, Mihai chu amaa chun malsâwmin um an ta, Hnam tinrêngin ama chu hamṭha tîng an tih,

¹⁸ Lalpa Pathien, Israelhai Pathien chu inpâkin um raw se, Ama chau hin thilmak a thaw hlak a.

¹⁹ A hming ropuitak hi kumkhawtluongin inpâkin um bawk sienla, Hnuoi pumpui khawm hi a ropuinaa suksipin um raw se; Amen, Amen.

²⁰ Jessai naupa David ṭawngṭâinahai chu a tâwp tah.