INPÂKNA HLABU 68 - Pathien Lekhabu Inthieng (BSI)

Sinai le hmun inthienga Pathien chu

Hla ṭhuoitu ta dingin: David Inpâkna Hla.

¹ Pathien chu tho sienla, ama dotuhai chu sukdarin um raw se, Ama theidatuhai khawm chu a hmaah tlânse raw se.

² Meikhu hi lên hmanga a um ang hin, anni chu lên hmang la; Khuoihlu hi mei luma ân tuihmang angin, Mi rilohai chu Pathien hmaah bohmang raw se.

³ Mi felhai ruok chu lâwmtakin um sienla, Pathien hmaah hlim raw hai se; Anih, lâwmtakin hlim raw hai se.

⁴ Pathien chawimawiin hla sak unla, a hming inpâkin sak ro; Tawlailîr thlalêrhai fethleng ding ta ding chun lamlien ding sung pâwng unla, A hming chu JAH a nih, a hmaa chun hlim ro.

⁵ Pathien a umna inthienga um chu, Pa nei lohai pa le hmeithaihai ngaituotu a nih.

⁶ Pathien chun mi malhai chu sûngkuo laiahai ân ṭhangtir hlak a; Mi intânghai chu a ṭhuoi suok a, vângneinaah a ṭhuoi lût hlak: Helhmanghai ruok chu ram ṭâwlah an um hlak.

⁷ Aw Pathien, i mihai hma ṭhuoia i hung suok a, Thlalêra i fethleng lai khan,

⁸ Hnuoi hi ân hnîng dur dur a, Vânhai khawm khi Pathien hmaa chun a far a, Sinai tlâng meu khawm saw Pathien hmaah, Israelhai Pathien hmaa chun ân hnîng dur dur kha.

⁹ Aw Pathien, nang chun ruo tamtak în sûrtir a, I rochan chu a chau lai khan i sukdet a.

¹⁰ I rawihai chun chutaka chun umhmun an khuor a, Aw Pathien, nang chun i ṭhatnain rimsihai ta dingin i buotsai a.

¹¹ Lalpain thu chu a pêk hlak a, Chanchin hriltu nuhmeihai chu pâwl lientak an nih.

¹² Sipaihai lalhai chu an tlânsie an tlânsie a, In nghâktunu chun râllâk sum chu a sem a.

¹³ Vaṭhu thla tangkaruoa tuoma, A thla hmawr khawm rângkachak engtaka tuom angin, Berâm huon kârahai dâm i zâl ding am a nih?

¹⁴ Iengkimthawtheiin chutaka chun lalhai chu a sukdar lai chu, Zalmon tlânga vûr sûr lai ang a nih.

¹⁵ Basan tlâng chu Pathien tlâng a na, Basan tlâng chu tlâng insângtak a nih.

¹⁶ Tlâng insângtakhai, Pathienin a umna dinga a tlâng dit chu, Iengdinga îtthika in mel am a na? Anih, Lalpa chu chutaka chun kumkhuoin a um zing ding a nih.

¹⁷ Pathien tawlailîr chu a sînga sîng, a sânga sâng tamtak a nih. Lalpa chu Sinai tlânga a um ang khan, chuong laia chun hmun inthiengah a um tah.

¹⁸ Nang chu chungtieng i hang fe a, i manhai chu salah i ṭhuoi a, Mihriemhai lai chun thilpêkhai i dawng a, Anih, helhmanghai lai khawm, Lalpa Pathien chu an kuoma a um theina dingin.

¹⁹ Lalpa ei phur ni tina a mi phurpêktu, A mi sandamtu Pathien chu inpâkin um raw se.

²⁰ Pathien chu ei ta dingin sanhimtu, Pathien a nih, Thinaa inthawka suoknahai chu Lalpa Jehovah ta a ni bawk.

²¹ Nisienlakhawm, Pathienin ama dotuhai lu chu sât khawi phawk a tih, A thiemnawnaa la fe pei, lu vun sam inbuktak chu.

²² Lalpain, “Basan rama inthawkin ṭhuoi nâwk ka ta, Tuipui mawng inthûktaka inthawk chu ṭhuoi nâwk ka tih.

²³ I ke chu thisena i phûm thei a, I ui leihai chun i dohaia inthawk chan a nei theina dingin,” a ta,

²⁴ Aw Pathien, i fe lai dâm an hmu a, Ka Pathien ka Laltak hmun inthienga a fe laihai chu.

²⁵ Nunghâk khuongtê benhai laia chun, Hlasaktuhai an fe hmasa a, iengkhat mûttuhai chun an zui a.

²⁶ Inkhâwmnaahai hin Pathien inpâk unla, Israel tuihnâra suokhai, Lalpa chu inpâk ro.

²⁷ Chutaka chun nau mitlum Benjamin an rorêltu a um a, Judahai mi lien le an upahai, Zebulunhai mi lienhai, Naphtalihai mi lienhai leh.

²⁸ I Pathien chun i thilthawtheina chu thu a pêk a, Aw Pathien, kan ta dinga thil i mi thawpêk chu sukhrât rawh.

²⁹ Jerusalema i biekin leiin, Lalhaiin lâwmmanhai la hung chawipêk an ti che.

³⁰ Tangkahai chu sirin, Phairuong laia sahrâng chu kâwk la, Bâwngchal tamtak, mi tin bâwngtêhai leh, Indo inhâwk mi tin chu a sukdar ta a.

³¹ Aiguptaa inthawkin mi lienhai hung suok an ta, Ethiopiahai chu an kut Pathien tienga phar dingin inhmâwng an tih.

³² Leihnuoi ramhai, Pathien chawimawiin hla sak unla, Aw Lalpa inpâkin hla sak ro.

³³ Vânhai vân, tiena umhai chunga chuong chu, Ngai ta, a râwl ân suo ie, râwl nasatak el chu.

³⁴ Pathien kuoma chun hrâtna pe ro, A ropuina chu Israelhai chungah a um a, A hrâtna chu vân dumhaia khin a um.

³⁵ Aw Pathien, i hmun inthienghaia inthawk chun ṭi i um a; Israelhai Pathien, ama ngei chun a mihai kuomah hrâtna le thilthawtheina a pêk hlak. Pathien chu inpâkin um raw se.