INPÂKNA HLABU 62 - Pathien Lekhabu Inthieng (BSI)

Pathien chau chu inhumhimna a nih

Hla ṭhuoitu ta dingin: Jeduthun danin. David Inpâkna Hla.

¹ Ka hringna hin Pathien chau a nghâk a, Amaa inthawk chun ka sandamna a hung suok ding a nih.

² Ama chau chu ka lungpui le a mi sandamtu a nih; Ka kulbîng insâng a na, nasatak chun inhnîng naw ningah.

³ Nangni po poin, sukhlum ding le, Lung bang inâwn thaw ang le, pal tlu vâng vâng thaw angin, Ieng chen am mi pakhat hi in thaw ding a na?

⁴ A ropuinaa inthawka nam thla ding ngawtin an inrâwn a, Khêl hril hi an lâwm zâwngtak a na, An bauin mal an sâwm a; nisienlakhawm, an lungrilin ṭawngsie an inphur si hlak.

⁵ Ka hringna, Pathien chau nghâk rawh; Ka beiseina hi ama kuoma inthawka suok a ni si a.

⁶ Ama chau chu ka lungpui le ka sandamna a nih; Ka kulbîng insâng a na, inhnîng naw ningah.

⁷ Pathien kuomah ka sandamna le ka ropuina a um a, Ka hrâtna lungpui le kân humhimna chu Pathienah a um a.

⁸ Nangni mipuihai, ienglai khawmin ama chu ring unla, In lungril chu a hmaa chun bunthla ro: Pathien chu ei ta dinga inhumhimna a nih.

⁹ Mi inhnuoihai hi iengkhawm an ni naw a, mi insânghai khawm hi khêl an nih; Bûknaa chun an inkâng dai a, Iengkhawm ni lo nêk khawmin an zâng lem a nih.

¹⁰ Nêksâwrna hi ring naw unla, Inrûknaa chun beiseina teplo innghat naw ro, Hausakna hung pung sien khawm, a chunga chun in lungril innghat bawk naw ro.

¹¹ Pathien chun vawikhat a hril a, E! hi hi vawi hni ka hriet tah: Thilthawtheina hi Pathien ta a nih ti hi.

¹² Aw Lalpa, zainêmna hi i ta bawk a nih, Mi tin an thilthaw ang sengin i thung hlak si a.