INPÂKNA HLABU 57 - Pathien Lekhabu Inthieng (BSI)

Sawisaktuhaia inthawka sanhim dinga ṭawngṭâina

Hla ṭhuoitu ta dingin: Altashhetha sak ding. David Inpâkna Hla: Miktam: Saulaa inthawka pûka a tlânhmang laia mi.

¹ Aw Pathien, mi lunginsiet rawh: Ka hringna hi nangmaa chun a hung tlulût si a: Anih, i thla hnuoia chun himna zawng ka tih, Vângduoinahai hi ân kieng hmakhat chun.

² Pathien Achunghnungtak chu ko ka ta, Pathien iengkim mi thawpêktu chu.

³ Mi lem zo tumtu chun a mi hrilsiet pha chun, Ama chun vâna inthawkin hung tir a ta, mi sanhim a tih: Pathienin a ngilneina le a thutak hung tir suok a tih.

⁴ Ka hringna hi sakeibaknei laiah a um a, Mihriem nauhai fa zo hmangtuhai laia chun ka zâl a. Chuonghai hahai chu fei le thalhai an nih; An lei chu kâwlhnâm ngeitak a nih.

⁵ Aw Pathien, nang chu vân khûm rak khin chawimawiin um la, I ropuina chu leihnuoi po po chunga hin hung um raw se.

⁶ Ka ke âwkna dingin lên an pha a, Ka hringna hi a tlep ngawi ngawi a, Ka hmaah khur an cho a, Anni ngei a lai takah an tla ta a.

⁷ Ka lungril hi a det a nih, aw Pathien, ka lungril hi a det a nih: Hla sak ka tih, anih, inpâkna hla sak ka tih.

⁸ Ka ropuina, har rawh, perkhuong le ṭingṭanghai, har ro: Kei chu zîngkâr har ka tih.

⁹ Aw Lalpa, mi tin laiahai chun lâwmthu hril ka ti che, Hnam tin laia chun nangma inpâkin hla sak ka tih.

¹⁰ I ngilneina chu vân tawng khawpin a nasa si a. I thutakna chu vân dum tawng khawpin a nasa bawk a.

¹¹ Aw Pathien, nang chu vân khûm dai khin chawimawiin um rawh, I ropuina chu leihnuoi po po chunga hin hung um raw se.