INPÂKNA HLABU 56 - Pathien Lekhabu Inthieng (BSI)

Ringnaa ṭawngṭâina

Hla ṭhuoitu ta dingin: Jonath-elemrehokima sak ding. David inpâkna hla: Miktam: Philistinhaiin Gath khuoah ama an man laia mi.

¹ Aw Pathien, mi lunginsiet la, mihriemin mi lem zo an tum si a; Sûnnithlâkin an mi thawin an mi nêksâwr hlak.

² Ka hmêlmahaiin sûnnithlâkin mi lem zo an tum a, Chapotaka mi thawtuhai hi an tam si a.

³ Ka ṭit châng po leh, Nangmaah ka ringna kân nghat a;

⁴ A thu ka inpâk Pathiena ngei chun. Pathien ka ring a, ṭi naw ningah; Tisa chun ieng am mi law thei a ta?

⁵ Sûnnithlâkin ka thuhai an lâkkâwi hlak a, An ngaituo po po chu ka sietna ding ruok a nih.

⁶ An inkhâwm a, an inbihmang a, Ka hniekhnung an inchik hlak a, Ka hringna sukbo tumin an inchân a;

⁷ Suol pumin an pumpel ding am a nih? Aw Pathien, lunginsenin mi tin chu suktlâwm rawh.

⁸ Nangin kân vâkvainahai hi în chik hlak a, Ka mitthlihai hi i savun pênga chun thun la. I lekhabuah a chuong tâwl naw am a nih?

⁹ Ka ko pha che chun a mi dotuhai chu tlânsieng an tih. Hi hi ka hriet, Pathienin a mi ṭan hi.

¹⁰ Pathiena chun a thu inpâk ka ta, Lalpaa chun a thu inpâk ka tih.

¹¹ Pathien ka ring a, ṭi naw ningah, Mihriemin ieng am mi law thei an ta?

¹² Aw Pathien, i kuomah thutiemhai ka nei a, Lâwmthu hrilna inthawinahaiin thung ka ti che.

¹³ Ka hringna hi thinaa inthawk i sanhim si a, Ka kehai hi tlu lo dingin i sanhim a ni naw am a nih? Mi hring vara hin, Pathien hmaa ka lêng theina dingin.