INPÂKNA HLABU 51 - Pathien Lekhabu Inthieng (BSI)

Sukthienghlimna dinga ṭawngṭâina

Hla ṭhuoitu ta dingin: David Inpâkna Hla. Bathseba a suolpui hnunga zawlnei Nathan a kuoma a hung laia mi

¹ Aw Pathien, i zainêm ang peiin mi lunginsiet la, I lainatna nasatzie ang peiin ka bawsietnahai hi thaihmang rawh.

² Ka rîtlonahai hi mi sâwpfaipêk var la, Ka suol hi mi sâwpfaipêk rawh.

³ Ka bawsietnahai hi ka hriet ta si a, Ka suol hi ka hmaah a um rawp hlak a nih.

⁴ I chungah, i chung chauah thil ka suksuol a, I mithmuah thil suol ka lo thaw ta a: Thu i hrilin thiem în changtir thei a, Ro i rêlin demkailo i ni theina dingin.

⁵ Ngai ta, rîtlonaa inngîrin ka um a, Ka nuin suolin a mi vawn a,

⁶ Ngai ta, sûngril tiengahai hin takna i dit hlak a, Chuongchun, ân lang naw tienga hin varna mîn hriettir i tih.

⁷ Husopin mi sukfai la, chuongchun, fai ka tih; Mi sâwpfai la, chuongchun, vûr nêkin vâr ka tih.

⁸ Hlimna lâwmna chu nain mîn hriettir la, I ru sukthliekhai hi a hlim theina dingin.

⁹ Ka suolnahaia inthawk hin i hmai thup la, Ka rîtlona po po hi thaihmang rawh.

¹⁰ Aw Pathien, keimaa hin lungril inthiengtak siem la, Ka sûnga hin thlarau indiktak siem thar nâwk rawh.

¹¹ I kuoma inthawk hin mi peihâwn naw la, I Thlarau Inthieng hi mi lapêk naw rawh.

¹² I mi sandam hlimna chu mi pe nâwk la, Tiawina thlarauin mi chel zing la;

¹³ Chuongchun, bawsetuhai chu i lampui chanchinhai inchûktir ka ta, Chuongchun, mi suolhai chu nanga tieng ngha nâwk an tih.

¹⁴ Aw Pathien, nang ka sandamna Pathien, thisen insuonahaia inthawk chun mi sanhim rawh; Chuongchun, ka lei hin i felna thu hi hlimtakin hlaah sak a tih.

¹⁵ Aw Lalpa, nangin ka hmûr hi hawng la, Chuongchun, ka bau hin inpâkna chu ân hriettir ding annâwm.

¹⁶ Inthawina chungah lâwmna i nei si naw a; chuong ni naw sien chu pêng ka tih; Pumrawhmanga thilinhlân chungah lungawina hrim i nei nawh.

¹⁷ Pathien dit zâwng inthawina chu thlarau lungriem ithlâk hi a na, Aw Pathien, lungril lungriem ithlâk le insîr ngawi ngawi hi hmusit naw ti nih.

¹⁸ I dit zâwng takin Zion chungah thil ṭha thaw la. Jerusalem kul chu rem rawh.

¹⁹ Chuongchun, felna inthawinahai chungah lâwmna nei tâng i ta, pumrawhmang thilinhlân le puminhlân thil chunga chun: Chuongchun, i maichâm chunga chun bâwngchalhai inhlân tâng an tih.