INPÂKNA HLABU 47 - Pathien Lekhabu Inthieng (BSI)

Pathien chu hnuoi chung po poa laltak a nih.

Hla ṭhuoitu ta dingin: Kora naupasalhai Inpâkna Hla.

¹ Aw mi tinrênghai, in kut ben unla, Hlimna râwlin Pathien kuomah khêk ro.

² Lalpa Achunghnungtak chu ṭi a um si a. Hnuoi chung po poah Lal ropuitak a nih.

³ Ama chun mi tin chu ei hnuoiah tukdawl a ta, Hnam tin chu ei ke hnuoiah tukdawl bawk a tih.

⁴ Ama chun ei rohluo ding chu mi thlangpêk a ta, A hmangai Jakob suongtak ram chu.

⁵ Pathien chu khêkri leh a hang fe a, Lalpa chu tawtawrâwt ri leh a hang fe tah.

⁶ Pathien inpâkin hla sak unla, inpâkin sak ro, Ei Laltak inpâkna hla sak unla, inpâkin sak ro.

⁷ Pathien chu khawvêl po po Lal a ni si a, Hrethiema inpâkin hla sak ro.

⁸ Pathien chu hnam tin chungah Lalah a ṭhung a, Pathien chu lalṭhungpha inthienga chun a ṭhung a,

⁹ Mi tin laia milienhai chu an um khâwm a, Abraham Pathien mihai ni dingin; Leihnuoi phawhai chu Pathien ta a ni si a, Ama chu nasataka chawimawiin a um a nih.