INPÂKNA HLABU 41 - Pathien Lekhabu Inthieng (BSI)

Sukdamna dinga ṭawngṭâina

Hla ṭhuoitu ta dingin. David Inpâkna Hla.

¹ Rimsihai ngaituo mi chu mi hamṭha a nih, Lunginzîng ni chun ama chu Lalpain sanhim a tih.

² Lalpain ama chu humhimin sukhring a ta, hnuoia hin malsâwmin um a tih; Nangin ama dotuhai nuom nuoma an thaw dingin pe naw ti ni.

³ Lalpain a chauna zâlhmuna chun sukhrât a ta, Nangin a damnaw laiin a zâlna siempêk vawng i tih,

⁴ Keiin, “Aw Lalpa, mi lunginsiet la, Ka hringna hi sukdam la, i chungah thil ka suksuol si a,” ka ti a.

⁵ A mi dotuhai chun, “Iengtik am thîng a ta, a hming bo a ti aw?” tiin, An mi hrilsiet hlak a.

⁶ Chun, anni laia tuin amanih a mi hung kan hlakin, thu teplo mei mei a hril hlak a; A lungril chun suolna a lâk khâwm hlak a, A fe suok phingleh mi a hril hlak.

⁷ A mi theidatuhai po po chu ka chungchângah an inbiekrûk a, Ka ta dinga thil ṭhanaw tâwpkhâwkhai an ngaituo hlak.

⁸ “Natna ṭha nawtakin a tlâkkhum ta a, Tuta a zâl hi tho nawk ta naw nih,” an ta.

⁹ Anih, ka ruol pâwlngei, ka ringtak, ka bei fâkpui ngei chun, A kekhawng chu ka chungah ân let ta a.

¹⁰ Nisienlakhawm, aw Lalpa, nangin mi lunginsiet la, Anni chu ka thung theina dingin mi keitho nâwk rawh.

¹¹ Hitaka hin ka chungah, i lâwm ti ka hriet, A mi dotu chun a mi hne ngai naw leiin.

¹² Kei chu lungril ṭhatak ka putnaa hin nangin i mi chel zing a, I hmaa chun kumkhuoa dingin i mi sie a.

¹³ Lalpa, Israel Pathien chu, Chatuona inthawka chatuon chenin inpâkin um raw se, Amen, Amen.