INPÂKNA HLABU 36 - Pathien Lekhabu Inthieng (BSI)

Pathien hmangaina tâwp neilo

Hla ṭhuoitu ta dingin: Lalpa siehlaw David Inpâkna Hla.

¹ Mi rilo bawsietna chun ka lungril sûnga hin thu a hril a, “A mithmuah Pathien ṭîna hrim hrim a um nawh,” tiin.

² “Ka khawhlona hmu suok naw ni hai a, theida hliek naw ni hai,” tiin. Mâni mithmuah mâni vêk ân pâk fâwm hlak a,

³ A baua thu suokhai chu suolna le hlêmna ruok a ni hlak a, Varna le thil ṭha thawna chu a bânsan ta a.

⁴ A khumlaizâwla chun thilsuol a ngaituo hlak a, Lampui ṭha nawa chun a fe hrâm hrâm a, Suolna chu a tirdak nawh.

Pathien ṭhatna

⁵ Aw Lalpa, i ngilneina chu vânhaia khin a um a, I ringumna chun vân dumhai khi a tawng a nih.

⁶ I felna chu Pathien tlânghai ang a na, I rorêlhai chu tui inthûk lientak ang a nih; Aw Lalpa, mihriem le sa khawm i humhim hlak.

⁷ Aw Pathien, i ngilneina chu a va hlu de! Mihriem nauhai chun i thla hnuoi an inchû hlak.

⁸ Anni chu i insûng thil ṭhain tlai bêk bêk an ta, I lâwmna vadunga mi chu indâwntir bawk i tih.

⁹ Hringna tuikhur chu i kuomah a um si a. I vara chun var la hmûng kan tih.

¹⁰ Aw, nangma hretuhai kuoma chun i ngilneina chu inlangtir pei la, Lungril indiktak puttuhai kuomah felna chu inlangtir pei bawk rawh,

¹¹ Chapo ke chu mi thaw dingin keia tieng hung pên naw sienla, Mi rilo kut khawmin mi hnawt hmang naw raw se.

¹² Sawtaka sawn thilsuksuoltuhai chu an tlu zing a, Nam thlûk an na, tho thei ta naw ni hai.