INPÂKNA HLABU 32 - Pathien Lekhabu Inthieng (BSI)

Ngaidamna hlutzie

David Inpâkna Hla. Maskil.

¹ A bawsietna ngaidama uma, a suolna inkhuma um chu, a hamṭha,

² Mi Lalpain rîtlona neia a ruot naw, A thlaraua hlêmna hrim hrim um naw chu, a hamṭha.

³ Ka suol ka topui zing lai khan, sunnithlâka kân rûmna leiin, Ka taksa hi a châu tiel tiel a.

⁴ A sûn a zânin i kutin a mi del si a; Ka taksa hnâwngna khawm, ṭhâlrumin thil a sukdanglam angin, a hung danglam ta hiel kha.

⁵ Ka suolna chu i kuomah ka puong a, Ka rîtlona chu ka ip ta naw a, “Ka bawsietna chu Lalpa kuomah thupha châwi tâng ka tih,” ka ti a; Chuongchun, ka suol rîtlona chu i lo ngaidam ta kha.

⁶ Chuleiin, Pathien ngaisak mi taphawt chu zawnghmu awla i um laiin i kuomah ṭawngṭâi seng raw hai se; Tui lienhai chu a hung liem pha chun anni chu a chîm phâk vak nawna dingin.

⁷ Nang chu kân bîkhmangna hmun i na, nang chun lunginzîngnaa inthawk mi humhim i ta, Sanhimna hlahaiin mîn huolvêltir i tih.

⁸ I fena ding lampui chu inchûktirin, kâwkhmûng ka ti che a, Ka mita en zing pum chein rem ruotpêk ka ti che.

⁹ Ngaituona nei naw sakawr amanih, sabengtung amani angin um naw ro, Anni chun chelngîrna ding thîrbar amanih, keingîrna dinga hrui dâm an ṭûl hlak si a; Chuong naw chun i kâwl hnaiah hung naw ni hai.

¹⁰ Mi rilo ta ding chun lungngaina tamtak um a ta, Lalpa ringtu ruok chu ngilneinain inhuolvêl lem a tih.

¹¹ Mi felhai, Lalpaah chun hlimin lâwm unla, Lungril indiktak put po pohai, hlimin khêk ro.