INPÂKNA HLABU 31 - Pathien Lekhabu Inthieng (BSI)

Ringna puongna

Hla ṭhuoitu ta dingin: David Inpâk hla

¹ Aw Lalpa, nangmaa chun ka ringna kân nghat hlak a, Iengtika khawm muolphoin mîn umtir naw la: I felna lei chun mi sanhim rawh.

² Keia tieng hin i na hung sit la, mi sanhim vat la, Ka ta dingin lungpui dettak, mi sandam dinga humhimna in, hung ni rawh.

³ Nang chu ka lungpui le ka kulpui i ni si a; Chuleiin, i hming leiin mi ṭhuoiin mi kei rawh.

⁴ Ka âwkna dinga a rûka lên an phaha inthawk hin mi kei suok la, Nang chu ka kulbîng i ni si a.

⁵ I kutah ka thlarau kân kawltir a, Aw Lalpa, thutak Pathien, nang chun i mîn tlan tah.

⁶ Milim teplo mei mei ngaisângtuhai chu ka theida a, Kei ruok chun chu Lalpa ka ring a nih.

⁷ I ngilneina lei hin hlimin lâwm ka tih. Ka lunginzîngna hi i hmu si hlak a, Ka hringna hi a rinum lai khawmin i hriet hlak.

⁸ A mi dotuhai kutah nangin i mi khum naw a, Ka ke hi hmun inthâwltakah în nghat ta lem a.

⁹ Aw Lalpa, mi lunginsiet la, lunginzîngin ka um si a, Ka mit hi lungngaina leiin a chau deu deu a, anih, ka hringna le ka taksa chenin.

¹⁰ Ka dam sûng hi lungngainain a liem ta si a, ka kumhai hi inrûmin a liem ta bawk a nih. Ka rîtlona leiin ka tha a ṭhum a, ka ruhai khawm a rawp zo ta a.

¹¹ A mi dotuhai leiin ka hming hi a hung se ta a, Anih, ka vênghai lai khawm nasatakin a se ta a nih, ka hmêlhriethai ta ding khawma ṭiumtak ka lo ni ta a: Khawlaia mi hmutuhai khan an mi tlânsan ta si a.

¹² Mi thi an theinghil ang taka theinghilin ka um a, Bêl kawi ang el ka hung ni ta a.

¹³ Mi tamtak mi hêkna ka hriet si a, Ka vêla ṭium um chu: An mi phier lai khan, Ka hringna mi lâkpêk an tum a.

¹⁴ Nisienlakhawm, aw Lalpa, ka ring che a, “Ka Pathien i nih,” ka ti a.

¹⁵ Ka hunhai chu i kutah a um a, A mi dotuhai le a mi suknawmnatuhaia inthawk hin mi sanhim rawh.

¹⁶ I hmêlin i siehlaw hi hung sunvar la, I ngilneina leiin mi sandam rawh.

¹⁷ Aw Lalpa, muolphoin mîn umtir naw la, ka ko si che a: Mi rilohai chu muolphoin um hai sienla, Seolah to zingin um raw se.

¹⁸ Hmûr khêlhliphai chu ṭawng thei lovin um raw se, Chuonghai chun chapo le hmusit pumin, Ṭawng chapotakin mi fel an hrilsiet hlak a.

¹⁹ Aw i ṭhatna, nangma ṭituhai ta dinga în khâwl chu a va nasa de; Mihriem nauhai mithmuha nangmaa ringna innghattuhai ta dinga i thawpêk chu.

²⁰ Anni chu mihriem phiernaa inthawk chun i humhimna mithmuah thuphmang i ta, Hnuoi sêlhrâtnaa inthawk chun bûktêah sie rûng i tih.

²¹ Lalpa chu inpâkin um raw se, A ngilneina maktak chu khawpui dettakah a mîn hmutir si a.

²² Kei hlak chun, ka lunginzingin, “I mithmuah inthawka pei hmangin ka um tah,” ka lo ti a. Nisienlakhawm, ka ko che khan, lunginsiet ka hnina râwlhai kha i lo hriet si a.

²³ Aw a mi inthieng po pohai, Lalpa chu hmangai ro: Lalpa chun mi ringum chu a humhim a, Chapotaka thawtu chu nasatakin a thung hlak.

²⁴ Lalpa beiseitu po pohai, Hrâttakin um unla, in lungril chu insukhuoi raw se.