INPÂKNA HLABU 30 - Pathien Lekhabu Inthieng (BSI)

Thinaa inthawka sansuokna leia lâwmthu hrilna

Inpâkna Hla: Pathien kuoma Biekin Inhlânna Hla. David Inpâkna Hla

¹ Aw Lalpa, chawimawi ka ti che, nangin i mi dawm sâng si a; A mi dotuhai chu mi diriem dingin i siem naw a.

² Aw Lalpa ka Pathien, Ka ko che a nangin i mi sukdam ta a.

³ Aw Lalpa, nangin ka hringna hi Seola inthawk chun i ṭhuoi suok a: Khur sûnga ka ṭum nawna dingin, nangin i mi hum dam si a.

⁴ Aw a mi inthienghai, Lalpa inpâkin hla sak unla, A hming inthieng chu inpâk ro.

⁵ A lungsen chu mitkhap kâr chaua ding a ni si a; A ditsakna ruok chu dam sûnga ding a nih. Ṭapna chun zânkhuo a dai thei a, Hlimna ruok chu zîngkâr a hung tlung hlak.

⁶ Kei chun chu ka hlawtling lai chun, “Iengtika khawm inhnîng naw ning,” ka ti a.

⁷ Lalpa, nangin i ditsakna leiin ka tlâng chu i lo inngîrdettir ta a: Nisienlakhawm, i hmai i thup a, ka lo lunginzîng ta a.

⁸ Aw Lalpa nang ka ko che a, Lalpa kuoma ngei chun lungsietna ka hni kha:

⁹ Khur sûnga ka zu ṭum chun ka thisena hin hlâwkna ieng am um a ta? Pilvut chun ân pâk ding che am a nih? I thutak chu ân hriettir ding am a nih?

¹⁰ Aw Lalpa, lo ngai la, mi lunginsiet rawh: Lalpa, nang chu mi ṭhangpuitu ni rawh.

¹¹ Ka mithi ngaina chu ka ta dingin lâmnaah în changtir a, Ka saiip puon chu i mi hlîppêk a, ka kâwngah hlimnain i mi khit ta a:

¹² Ka ropuina hi to zing lova, nangma inpâka hla a sakna dingin, Aw Lalpa ka Pathien, kumkhuoin lâwmthu hril rawp ka ti che.