INPÂKNA HLABU 25 - Pathien Lekhabu Inthieng (BSI)

Inchûktir ding le ngaidam ding le vênghim dinga ngênna

David Inpâkna Hla

¹ Aw Lalpa, ka lungril hi i kuomah ka sie tlat hlak,

² Aw ka Pathien, nang ka ring che a, Muolphoin mîn umtir naw la, A mi dotuhai mi ngam ding chu phal naw rawh.

³ Anih, nangma nghâktu hrim hrim chu tukhawm muolphoin um naw ni hai, A san um lova vervêktaka thawtuhai ruok chu muolphoin um an tih.

⁴ Aw Lalpa, i lampuihai chu mîn hriettir la, I lampui chanchinhai chu mîn chûktir rawh.

⁵ I thutaka chun mi ṭhuoi la, mîn chûktir rawh, Nang chu a mi sandamtu Pathien i ni si a; Sûnnithlâkin ka nghâk zing che hi.

⁶ Aw Lalpa, i lainatnahai le i ngilneinahai chu hre zing la, Inhmaa lo um kumkhuo tah a ni si a.

⁷ Ka tleirâwl lai suolnahai le ka bawsietnahai chu hre zing naw la, Aw Lalpa, i ṭhatna leiin, I ngilneizie ang peiin mi hre zing rawh.

⁸ Lalpa chu a ṭhain ân dik a nih, Chuleiin, mi suolhai chu lampui kâwkhmûng a tih.

⁹ Thuhnuoirawlhai chu rorêlna felah ṭhuoi a ta, Thuhnuoirawlhai chu ama lampui chanchin inchûktir bawk a tih.

¹⁰ A thuthlung le a thuinhriettir zâwmtuhai ta ding chun, Lalpa lampui po pohai chu ngilneina le thutak vawng a nih.

¹¹ Aw Lalpa, i hming leiin, Ka rîtlona ngaidam la, nasatak a ni si a.

¹² Lalpa ṭi mi chu tu am a na? Ama chu a lampui thlang ding chu lân entir a tih.

¹³ A hringna chu inhawitirtakin um a ta, A thlahai chun ram chu la hluong an tih.

¹⁴ Lalpa thurûk chu ama ṭituhai kuomah a um a, A thuthlung chu anni inhriettir a tih.

¹⁵ Ka mitin Lalpa tieng a en rawp hlak a, Ama chun ka kehai hi lêna inthawk chun a lâk suok ding a ni si a.

¹⁶ Keia tieng hung ngha la, mi lunginsiet rawh, Khawsâwt le rinumtakin ka um si a.

¹⁷ Ka lungril buoinahai hi a hung nasa ta a, Aw ka lungzingnahaia inthawk hin mi ṭhuoi suok rawh.

¹⁸ Ka rinumzie le ka tuorzie hi ngaituo la, Ka suol po po mi ngaidam rawh.

¹⁹ A mi dotuhai chu ngaituo ta, tamtak an nih, Nasatakin an mi theida si a.

²⁰ Aw ka hringna vawngṭha la, mi sanhim rawh; Muolphoin mîn umtir naw la, nangmaa chun ka ringna kân nghat si a.

²¹ Lungril ṭhatna le indiknain mi vawng ṭha zing raw se. Ka nghâk zing si che a.

²² Aw Pathien, Israelhai hi, An lunginzîngna po poa inthawkin sansuok rawh.