INPÂKNA HLABU 24 - Pathien Lekhabu Inthieng (BSI)

Ropuina Lal chu

David Inpâkna Hla

¹ Leilung hi Lalpa ta a na, a sûnga um po pohai leh, Khawvêl le a sûnga chênghai le hin.

² Tuisuoriet chungahai amain ân dinsuo a ni si a Tuilienhai chunga khawm a sukdet bawk a.

³ Lalpa tlângah tu am hang lâwn a ta? A hmun inthiengah tu am ngîr a ta?

⁴ Kut fai le lungril inthieng neia, A lungril teplo mei mei tienga sie ngailo: Hlêm tuma inkhâm ngailo mi chu.

⁵ Ama chun Lalpa kuoma inthawkin malsâwmna hmûng a ta, A sandamtu Pathien kuoma inthawkin felna dawng bawk a tih.

⁶ Chu chu ama zawngtuhai suon a nih, Aw Jakob Pathien, i hmêl zawngtuhai chu.

⁷ Aw kul kawtkhârhai, in lu chung kha dawm sâng unla, Nangni kawtkhâr hlunhai, inkhai sâng ro: Chuongchun, ropuina Lalpa hi a hung lût ding a nih.

⁸ Ropuina Lal chu tu am a na? Lalpa hrâttak le thilthawtheitak, Lalpa indonaa thilthawtheitak chu a nih.

⁹ Aw kul kawtkhârhai, in lu chunghai kha dawm sâng ro, Anih, kawtkhâr hlunhai, dawm sâng unla, Chuongchun, Ropuina Lal hi a hung lût ding a nih.

¹⁰ Chu Ropuina Lal chu tu am a na? Sipaihai Lalpa chu, Ama ngei hi Ropuina Lal chu a nih.