INPÂKNA HLABU 22 - Pathien Lekhabu Inthieng (BSI)

Beidawng khêk râwl le inpâkna hla

Hla ṭhuoitu ta dingin: Aijeloth-bas-Sahara sak ding. David Inpâkna Hla.

¹ Ka Pathien, ka Pathien, iengdinga i mi mâksan am? Iengdinga mi ṭhangpui dinga i hlat hle a, kân rûmna thuhaia inthawka i hla am a na?

² Aw ka Pathien, sûnah ka khêk a; nisienlakhawm, i dawn si nawh, Zânah ka khêk bawk a, ka to chuong nawh.

³ Nisienlakhawm, aw nang Israelhai inpâknaa chêng hlak, Nang chu în thieng a nih.

⁴ Kan thlatuhai chun an lo ring che a, An ring a; chuongchun, nangin i lo sandam hlak.

⁵ An ko che a; chuongchun, sanhimin an um hlak a, An ring che a; chuongchun, muolphoin an um ngai nawh.

⁶ Kei ruok chu mihriem hrim ka ni naw a, chawkchawnâl el ka nih, Mihriemhai hrilsiet le mihai hmusit ka nih.

⁷ A mi hmu taphawtin an mi nuisan a, An hner an phen a, an lu an thin a;

⁸ “Lalpa chungah innghat ta la, ama chun ama hi sandam raw se chu! A chungah a lâwm leiin sanhim raw se chu,” an ti a.

⁹ Nang ruok chu sula inthawka mi la suoktu i na, Ka nu nêne chunga ka um lai khan nangin i mîn ringtir a.

¹⁰ Sula inthawk hrimin nangma chunga innghat ka na, Nang chu ka nu phîng sûnga inthawk hrim tah ka Pathien i nih.

¹¹ Mîn hlat lul naw rawh, lunginzingna ding a hnai si a, Ṭhangpuitu ding hrim hrim an um si nawh.

¹² Sebâwngchal tamtakin an mîn huolvêl a, Basan rama sebâwngchal hrâttakhai chun an mîn huolvêl khup a.

¹³ Sakeibaknei hnukinrâwl inhûk hmang angin, An bauvin an mi khêkkhum a.

¹⁴ Tui anga bunthlâkin ka um a, Ka ru po po khawm inpelsawlin a um a, Ka lungril hi khuoihlu ang a na; ka rîl lai hin ân tui zo tah.

¹⁵ Ka tha hi bekawihâr angin a ṭâwl zo vawng a, Ka lei khawm hi ka dangah a kawp ta tlat a; Nangin thina pilvuta hin i mi ṭhuoi lût tah a ni hi.

¹⁶ Uihai chun an mîn huolvêl si a, Thil ṭha naw thawtu um khâwmhai chun an mîn huol tlat a, Ka kut le ka kehai hi an sukpawp a.

¹⁷ Ka ru po po hi ka tiem vawng thei a, Anni hlak chun an mi enin an mi mel zing a:

¹⁸ Ka silfênhai an insem a, Ka zakuo dingin ṭhum an vâwr a,

¹⁹ Nang ruok chun, aw Lalpa, mîn hlat lul naw la, Aw, mi sukhrâttu, mi ṭhangpui dingin inhmaw rawh.

²⁰ Ka hringna hi kâwlhnâma inthawk chun sanhim la. Ka hringna hi ui thilthawtheinaa inthawk chun sanhim rawh.

²¹ Sakeibaknei baua inthawk chu mi sanhim la, Anih, ramsielchal kiha mi chu nangin i mi dawn ta a.

²² Ka unauhai kuomah i hming hril ka ta, Inkhâwmhai laia chun inpâk ka ti che.

²³ Lalpa ṭituhai, ama chu inpâk ro, Jakob thla po pohai, ama chu chawimawi ro; Israel thla po pohai, ama chu ṭi ro.

²⁴ Ama chun rinum tuortu rinumzie chu a hmusit naw a, a tirdak bawk nawh; A hmai chu a kuoma inthawkin a thup naw a, Ama a ko chun a lo ngai lem hlak.

²⁵ Inkhâwmna ropuitaka kân pâk hlakna che hi nangma kuoma mi a na, Ama ṭîtuhai hmaa chun ka thutiem hi hlen ka tih.

²⁶ Thuhnuoirawlhai chun fâng an ta, tlai an tih: Ama zawngtuhai chun Lalpa chu inpâk an ta, An lungril chu kumkhuoin hringin um raw se.

²⁷ Kâwlkawdawnga mi po po khawmin hre nâwk an ta, Lalpa tieng ngha tâng an tih: Hnam tina chi tin i hmaah kûn an tih.

²⁸ Ram chu Lalpa ta a na, Hnam tin chungah rorêltu a ni si a.

²⁹ Hnuoia mi neinunghai po po chun fain chibai bûk an ta, Pilvuta kîr nâwk dinghai po po khawm chu a hmaah la kûn an tih: Mâni hringna sukhring zing thei lo chu.

³⁰ Chi inthlain a rawng bâwl an ta, Ṭhangthar hung um nâwkhai kuoma chun Lalpa chanchin chu la hril an tih.

³¹ Hung an ta, hnam la hung suok dinghai kuoma chun, “A thaw zo tah,” tiin, a felzie chu lân hriettir an tih.