INPÂKNA HLABU 21 - Pathien Lekhabu Inthieng (BSI)

Hmêlma kuta inthawka sanhimna leia inpâkna

Hla ṭhuoitu ta dingin: David Inpâkna Hla

¹ Aw Lalpa, lal chu i hrâtnaa hin hlim a ta, I sandamnaa hin a va hlim nasa âwm de;

² A lungril dit zâwng chu i pêk a, A hmûra a thil hni chu i phal naw naw a.

³ Ṭhatnaa malsâwmnahaiin i tuok a, Rângkachak inthieng lallukhum în khumtir si a.

⁴ Ama chun hringna a hni che a, i lo pêk a, Kumkhawtluonga dam zingna chu.

⁵ I sandamnaa chun a ropuina chu a nasa a nih, Chawimawina le ropuina a chungah în nghat hlak a.

⁶ Kumkhuoa dingin malsâwmna nasatak dawngin i siem si a I hmaah hlimnain i suklâwm hlak.

⁷ Lal chun Lalpa chu a ring si a, Achunghnungtak ngilneina leiin inhnîng naw ni.

⁸ I kutin nanga dotu po pohai che chu zawng suok i ta, I kut changtieng chun nangma theidatuhai che chu zawng suok a tih.

⁹ I lungsen pha chun anni chu rawtuina mei chawk zur zur ang chun siem i ta, Lalpa chun anni chu lunginsenin lem zo a ta, Mei chun kâng hmang el a tih.

¹⁰ An rahai chu hnuoia inthawk chun sukbo i ta, An thlahai chu mihriem nauhai laia inthawkin sukbohmang bawk i tih.

¹¹ I chunga khan thil suol thaw an tum si a, Thil suol an ngaituo suok a, an thaw thei si nawh.

¹² Nangin anni chu în hnungsawntir ding a ni si a, I thalhruihai chu an hmai tinin kuoisa diem i tih,

¹³ Aw Lalpa, i hrâtnaa chun chawimawiin um la, Chuongchun, i thilthawtheina inpâkin hla sak kan tih.