INPÂKNA HLABU 19 - Pathien Lekhabu Inthieng (BSI)Pathien thilthawhai le a Dân Hla ṭhuoitu ta dingin: David Inpâkna Hla 1 Vânhai khin Pathien ropuizie chu ân hriettir a, Boruok lientak khin a kutsuok chu ân langtir hlak a. 2 Sûn hin sûn kuomah thu a hril sâwng pei a, Zânin zân kuomah hrietna ân lang sâwngtir pei hlak. 3 Thuhril hrim hrim le ṭawng hrim hrim a um naw a, An râwl chu naa hriet thei a ni nawh. 4 An inkhina hrui po po chu hnuoi chung po poa keimarin a um a, An thu chu kâwlkawdawng chenin ân thang suok ta a. Chuonghaia chun nisa ta ding khin puon in a kei a, 5 Chu nisa chu moneitu ding a pindana inthawka suok ang a nih, Mi hrâttak angin a tlânna lampuia tlân ding chu a hlim hlak. 6 A suokna chu kâwlkawdawng tawpa inthawkin a na, A tlân kuolna chu a tâwp khingtieng chen a nih; A lumna chu hre lo dinga thuphmang hrim hrim a um nawh. 7 Lalpa dân chu a ṭha famkim a, hringna a siemṭha hlak, Lalpa thu inhriettir chu ring a um a, mi mâwl a sukvar hlak. 8 Lalpa thununna thu chu ân dik a, lungril a suklâwm hlak, Lalpa thupêk chu ân thieng a, mithai a sukvar hlak. 9 Lalpa ṭina chu a fai a, kumkhuo a dai hlak, Lalpa rorêlna chu ân dik a, a fel vêl vawng a nih. 10 Chuong chu rângkachak nêka ditum a na; anih, rângkachak inthieng tamtak nêk khawmin. Khuoizu le khuoithlâr nêk khawmin a thlum lem bawk a nih. 11 Chu nawa khawm chuong thuhai chun i siehlaw hi vaulâwkin ka um hlak a. Chuong zâwm chu lâwmman nasatak neina a ni hlak. 12 Tuin am mâni suksuolhai hre thei a ta? Suol inthuphaia inthawk hin mi sukkieng rawh. 13 Thil suksuol ngainaw dingin i siehlaw hi mi chel la, Ka chungah anni chu thu inneitir naw la; chuongchun, ṭha famkimin um ka tih. Bawsietna nasataka inthawkin demkailovin um ka tih. 14 Aw Lalpa ka lungpui le a mîn tlantu, Ka baua thu suokhai le ka lungrila ngaituonahai hi i mithmuah lâwmtlâkin um raw se. |
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
Bible Society of India