INPÂKNA HLABU 18 - Pathien Lekhabu Inthieng (BSI)

David a sansuokna hla

Hla ṭhuoitu ta dingin Lalpa siehlaw David inpâkna hla. Ama dotuhai po po le Saula kuta inthawka Lalpain a sanhim ni chun hi hla thuhai hi Lalpa kuomah a hril a, hieng ang hin a hril a:

¹ Aw Lalpa ka hrâtna, ka hmangai che.

² Lalpa chu ka lungpui le, ka kulpui le a mi sanhimtu a nih; Ka Pathien, ka lungpui dettak a nih, amaa chun ka ringna innghat ka tih; Ka phaw le, ka sandamna ki le, ka kulbîng insâng a nih.

³ Inpâktlâk Lalpa chu ko ka ta, Chuongchun, a mi dotuhaia inthawkin sanhimin um ka tih.

⁴ Thina hruihruolhai chun a mi zem a, Pathien ngaisak nawna tuilienhai chun a mi sukṭi bawk a.

⁵ Seol hruihruolhai chun a mi khuop tlat a, Thina chânghai chun a mi âwk a;

⁶ Ka lunginzîngin Lalpa chu ka ko hlak a, Ka Pathien ka ko hlak; Ama chun a biekina inthawk chun ka râwl chu a hriet a, A hmaa ka khêkri chu a naah a lût ta a.

⁷ Chu phingle chun hnuoi hi ân hnîng a, ân thin ta a, A lunginsen leiin tlânghai khawm chu, Ân nghatna pumin ân thinin ân hnîng ta a.

⁸ A hnâra inthawk chu meikhu ân tung ta ngut ngut a, A baua suok mei chun a kâng ta dur dur a; Chu chun meihawl khawm chu a sukchawk ta hum hum a.

⁹ Ama chun vânhai khawm chu ân kûntir a, a ṭum ta a. A ke hnuoia chun inthim sâmup hi a hung um ta a.

¹⁰ Cherub chungah a chuong a, a vuong ta a; Anih, thli thlaahai chun a vuong thuok thuok a.

¹¹ Inthim hi ân bîkhmangna hmunah, ama inhuol vêlna bûktêah a siem a, Tuia inthimna vâna sûm sâmuphai chu.

¹² A hmaa vara inthawk chun a sûm sâmuphai chu an inkieng a, Ṭêk le rielhai chu a tla ta ur ur a

¹³ Lalpa chu vânahai khin ân ri ta dur dur bawk a, Achunghnungtak chun a râwl ân suo a, Rielso le ṭêk mei inhlap ri ân ri rum rum a

¹⁴ Chun, a thalhai chu a kâp suok a, anni chu a sukdar a, Anih, kâwlhai ân leptir zawt zawt zing a, a sukbuoi tâwl ta a.

¹⁵ Chu phingleh, Aw Lalpa, i kâwkna leiin, I hnâra inthuok suok chun a mût rak leiin, Tui luongnahai chu a hung inlang a; Leilung innghatna chu suklangin a um ta a.

¹⁶ Ama chun chungtienga inthawkin a hung ban a, a mi chel a; Tui tamtaka inthawk chu a mi kei suok ta a.

¹⁷ A mi dotu hrâttaka inthawk chun a mi sanhim ta a; A mi theidatuhaia inthawk khawmin; Keia ta ding chun an hrât talaw si a.

¹⁸ Anni chun ka vângduoi ni chun an mi thaw a, Nisienlakhawm, Lalpa chu ka suong tak a nih.

¹⁹ Ama chun hmun inthâwltakah a mi ṭhuoi suok a, Ka chungah a lâwm leiin a mi lo sanhim tah a nih.

²⁰ Lalpa chun ka felzie ang ngeiin ka chungah a thaw a, Ka kuthai ân thieng ang ngeiin a mi thung a nih.

²¹ Lalpa lampuihai chu ka hraw a, Ka Pathien kuoma inthawkin rilotakin ka fe hmang ngai si naw a.

²² A dânhai po po ka hmaah a um hlak a, A thuruothai chu ka pei ngai si naw a.

²³ Ama kuoma chun demkailo ka lo na, Ka khawhlonaa inthawk chun kân siekieng hlak.

²⁴ Chuleiin, Lalpa chun ka felzie ang peiin a mi thung ta a, Ka kuthai a mithmuah ân thieng ang peiin.

²⁵ Mi lunginsietthei tak kuoma chun lunginsietthei takin insuklang i ta, Mi ṭha famkim kuoma chun ṭha famkimin insuklang i tih.

²⁶ Mi inthieng kuoma chun inthiengin insuklang i ta, Chun, mi kâwmaw kuoma chun kâwmaw takin insuklang i tih.

²⁷ Rinum tuor mihai chu i sandam ding a ni si a, Mi chapohai ruok chu suktlâwm i tih.

²⁸ Nangin ka khâwnvar hi i mi sitpêk ding a ni si a, Lalpa ka Pathien chun kân thimna hi sukvar a tih.

²⁹ Nangma iṭhangpuiin, râl ka baw si a, Ka Pathien ṭhangpui bawkin kul bang chu châwm hlîm ka tih.

³⁰ Pathien chu a lampui chu a ṭhafamkim a, Lalpa thu chu fie a ni ta a, Amaa ringna innghattuhai po po ta ding chun ama chu phaw a nih.

³¹ Lalpa naw chu tu am Pathien a um a? Ei Pathien naw chu tu am lungpui a um a?

³² Hrâtnaa ka tâia mi khittu le, Ka lampui sukṭha famkimtu Pathien chu.

³³ Ama chun ka ke hi sazukpui ke angin a siem a, Ka hmun insângtakahai a min umtir hlak a.

³⁴ Ka kuthai hi râl kâp dingin ân chûktir hlak a, Chuongchun, ka bânhai hin dâr thalngul a kuoi zo hiel a.

³⁵ Nangin i sandamna phaw chu i mi pêk bawk a: I kut changtiengin i mi kei a, I inngaitlâwmna chun a mi siem lien ta a.

³⁶ Ka hnuoia ka kalchawina chu i suklien a, Chuongchun, ka kehai hi ân tleu nawh.

³⁷ A mi dotuhai chu hnawt ka ta, hnawt phâk el ka tih, Sukbohmanga an um hmakhat chun nghakîr ta naw bawk ka tih.

³⁸ An tho nâwk thei nawna dingin sât sawk ka ta, Ka ke hnuoia hin tlu tâwl an tih.

³⁹ Nangin inthawnaa ding chun hrâtnain ka tâiah i mi khit a, A mi hung thawtuhai chu ka hnuoiah i suktlâwm ta a.

⁴⁰ A mitheidatuhai chu ka sukbohmang theina dingin, Nangin a mi dotuhai chu hnung mîn nghatin în umtir ta bawk a.

⁴¹ Anni chu an khêk a, nisienlakhawm, sandamtu ding tukhawm an um si nawh, Lalpa ngei chu an ko va, nisienlakhawm, a dawn si nawh.

⁴² Chu phingleh, pilvut thli ilên ang el hin ka vuok nâwi neng a, Tuollaia chirhak ang el hin ka peihâwn ta a.

⁴³ Nangin mihai insuolnaa inthawk chun i mi sanhim ta a, Hnam tinhai lua chun i mi siem ta a. Ka hriet ngailo mihai chun ka rawng bâwl tâng an tih.

⁴⁴ Ka chanchin an hriet phingleh ka thu awi an ta, Hmêlmak mihai chu ka kuomah intuklût an tih.

⁴⁵ Hmêlmak mihai chu hung zuoi an ta, An kulbînga inthawk chun inthin pumin hung suok an tih.

⁴⁶ Lalpa chu a hring zing a, ka lungpui chu inpâkin um raw se, A mi sandamtu Pathien chu chawimawiin um raw se.

⁴⁷ Phuba mi lapêktu le, Mi tin ka hnuoia suktlâwmtu Pathien ngei chu.

⁴⁸ Ama chun a mi dotuhaia inthawk chun a mi sansuok a, Anih, nangin a mi thawtuhai chungtieng chun i mi dawm kâng a, Mi nunrâwnga inthawk chun i mi sanhim hlak.

⁴⁹ Chuleiin, aw Lalpa, hnam tin lai chun lâwmthu hril ka ti che a, I hming inpâkin hla sak bawk ka tih.

⁵⁰ Ama chun hnena ropuitak a lal siem kuoma chun a pêk hlak a, A hrieknâl chungah, David le a thlahai chung ngeia chun, Kumkhawtluongin a ngilneizie inlangtir a tih.