INPÂKNA HLABU 150 - Pathien Lekhabu Inthieng (BSI)

Lalpa chu inpâk ro

¹ Lalpa chu inpâk ro, Pathien chu a hmun inthienga chun inpâk unla, A thilthawtheina boruok lientaka khin ama chu inpâk ro.

² A thilthaw ropuitakhai leiin ama chu inpâk unla, A ropui nasatzie ang peiin ama chu inpâk ro.

³ Tawtawrâwt riin ama chu inpâk unla, Perkhuong le ṭingṭangin ama chu inpâk ro.

⁴ Khuongtê le lâmin ama chu inpâk unla, Ṭingṭang chi tum tum le theihlein ama chu inpâk ro.

⁵ Dârbenthek ri thûm miin ama chu inpâk unla, Dârbenthek ri infiek miin ama chu inpâk ro.

⁶ Iengkim inthuokthei taphawt chun Lalpa chu inpâk raw se. Lalpa chu inpâk ro.