INPÂKNA HLABU 147 - Pathien Lekhabu Inthieng (BSI)

Lalpain Jerusalem a ngaisak leia inpâkna

¹ Lalpa chu inpâk ro, Ei Pathien inpâkna hla sak hi a ṭha si a; Chu chu ân hawiin, inpâk hi a âwm hrim a nih.

² Lalpa chun Jerusalem chu ân ngîr nâwk a. Israel hnawtsuoka umhai chu a ṭhuoi khâwm nâwk a.

³ Lungriem ithlâkhai chu a sukdam a, An hliemnahai chu a tuom hlak a.

⁴ Arasi tam chin a tiem a, An hming ân bûk seng tâwl hlak a.

⁵ Ei Lalpa chu a ropui a, thilthawthei tienga khawm hrâttak a nih, A varna chun tâwpintai a nei nawh.

⁶ Lalpa chun thuhnuoirawlhai chu a chel zing a, Mi rilohai chu hnuoiah a pei thlâk hlak.

⁷ Lâwmthu hrila Lalpa chawimawiin hla sak unla, Ṭingṭang leh ei Pathien inpâkin hla sak ro.

⁸ Ama chun vân khi sûm ân zâm hlietir a, Leihnuoi ta dingin ruo a buotsai a, Tlângahai chun hlobet ân mâwngtir hlak.

⁹ Ama chun sa kuomah a fâk ding a pêk hlak a, Vaâk tê inhrâm inhrâmhai kuoma leh.

¹⁰ Ama chu sakawr hrâtna chunga chun a lâwm naw a, Mihriem kehai chunga khawm lâwmna hrim hrim a nei ngai nawh.

¹¹ Lalpa chun ama ṭituhai chunga chun lâwmna a nei hlak, A ngilneina beiseituhai chunga chun.

¹² Aw Jerusalem, Lalpa chu inpâk rawh, Aw Zion, i Pathien chu inpâk rawh.

¹³ Ama chun i kul kawtkhârhai kalna thingtluonhai chu a sukngar a, I sûnga i nau le te umhai chu mal a sâwm si a.

¹⁴ I ramri sûnga chun inremna a siem a, Bu ṭhatak chiin a suksip hlak che a nih.

¹⁵ A thupêk chu hnuoia hin a tir suok a, A thu chu hrâttakin a tlân hlak.

¹⁶ Vûr sûr chu berâm hmul angin a pêk a, Vûr tla chu vut angin a the dar hlak.

¹⁷ A tui inkhal chu bei nawi hlek angin a pei suok a. A dei chu tuin am tuor thei a ta?

¹⁸ A thu chu a tir suok a, chuong chu a suktui a, A thli ân hrângtir a; chuongchun, tuihai chu a hung luong hlak.

¹⁹ A thu chu Jakobhai kuomah ân langtir a, A thuruothai le a rorêlhai khawm chu Israelhai kuomah ân langtir a.

²⁰ Ama chun ieng hnam chunga khawm chuong ang chun a thaw ngai nawh: A rorêlhai hlak chu an hriet bawk nawh. Lalpa chu inpâk ro.