INPÂKNA HLABU 146 - Pathien Lekhabu Inthieng (BSI)

Lalpa thilthaw felhai leia inpâkna

¹ Lalpa chu inpâk ro, Aw ka hringna, Lalpa chu inpâk rawh.

² Ka dam sûng po chun Lalpa chu inpâk ka ta, Ka hring sûng po chun ka Pathien inpâkin hla sak ka tih.

³ Mi lienhai chu ring naw unla, Mihriem naupa ṭhangpuina hrim hrim um nawna chu, ring bawk naw ro.

⁴ A thuokin a suok san a, ama chu leihnuoiah a kîr nâwk a, Chu ni ngei chun a ngaituonahai chu a bo nghâl a nih.

⁵ Jakob Pathien ṭhangpuitua nei chu lâwmtakin a um hlak; Lalpa Pathiena beiseina neitu chu.

⁶ Ama chu hnuoi dâm, vân dâm, Tuisuoriet dâm le an sûnga um po po siemtu a nih; Ama chun thutak kumkhuoa dingin a vawng ṭha hlak a nih.

⁷ Ama chun nêksâwrna tuorhai ta dingin ro a rêl hlak, Ama chun phîngṭâmhai kuomah bu a pêk hlak. Lalpa chun mi intânghai chu ân suoktir hlak.

⁸ Lalpa chun mitdelhai mit a sukvar hlak a, Lalpa chun kûn ngâwi ngâwi hai chu a keitho hlak a; Lalpa chun mi felhai chu a hmangai hlak.

⁹ Lalpa chun mikhuolhai chu a vawng ṭha hlak a, Pa neilo le hmeithai chu a chel zing hlak a; Mi rilohai lampui ruok chu a sukletling hlak.

¹⁰ Lalpa chu kumkhawtluongin lalah ṭhung a ta, Aw Zion, i Pathien chu suon po po chenin lalah ṭhung a tih. Lalpa chu inpâk ro.