INPÂKNA HLABU 145 - Pathien Lekhabu Inthieng (BSI)

Lalpa ṭhatna le thilthawtheina leia inpâkna

Kai Hla. David ta.

¹ Aw Laltak, ka Pathien, chawimawi ka ti che a, I hming hi kumkhawtluongin inpâk ka tih.

² Ni tin inpâk ka ti che a, I hming hi kumkhawtluongin inpâk ka tih.

³ Lalpa chu a ropui a, nasataka inpâk ding a nih, A ropuizie chu suisuok ruol a ni nawh.

⁴ Suon khatin suon dang kâwlah i thilthawhai chu inpâk sâwng pei an ta, I thilthaw ropuitakhai chu inhriettir an tih.

⁵ Nangma chawimawina mawizie ropuitak le, I thilmak thawhai chu ngaituong ka tih.

⁶ Mihaiin i thilthaw râpthlâktak hrâtzie chu hril an ta, Kei khawma i ropuizie inhriettir bawk ka tih.

⁷ I ṭhatna ropuitak an hriet zing chu hril an ta, I felna thu hi hlimtakin hlain sak an tih.

⁸ Lalpa chu mi lunginsiet thei, lainatnaa sip, Lunginuoi, ngilneina nasatak nei a nih.

⁹ Lalpa chu iengkim chunga khawm a ṭha a nih; A lainatnahai chu a thil siem po po chungah a um a.

¹⁰ Aw Lalpa, i thil siem po po chun i kuomah lâwmthu hril an tih; Mi inthienghai khawma inpâk an ti che.

¹¹ I ram ropuizie thu hrilin, I thilthawtheina thu chu thusimah la hmang an tih.

¹² Mihriem nauhai kuoma a thilthaw ropuitakhai le, A ram mawina ropuizie inhriettir dingin.

¹³ I ram chu chatuon ram ding a na, I thuneina chu suon um sûng po poin um zing a tih.

¹⁴ Lalpa chun a tluhai po po chu a chel zing hlak a, Kûn ngawi ngawia um po pohai chu a keitho hlak.

¹⁵ I thil siem po po mithai chun an nghâk hlak che a nih; Nangin a hun takah an bu i pêk hlak.

¹⁶ I kut i phar a, Thilhring po po châkna chu i sukbopêk hlak.

¹⁷ Lalpa chu a um dân po poah a felin, A thilthaw po poah mi lunginsiettheitak a ni hlak.

¹⁸ Lalpa chun ama kotuhai po po chu a hnai hlak a, Titakzeta ama kotu po pohai chu.

¹⁹ Ama ṭituhai dit chu inhlawtlingtir a ta, An khêkri chu hrieng a ta, anni sandam a tih.

²⁰ Lalpa chun ama hmangaituhai po po chu a vawng ṭha hlak, Mi rilo ruok chu sukbohmang vawng a tih.

²¹ Ka bau hin Lalpa inpâkna thu hril a ta; Chun, taksa po po chun a hming inthieng chu kumkhawtluongin inpâk raw se.