INPÂKNA HLABU 143 - Pathien Lekhabu Inthieng (BSI)

Sansuokna le hliekhuna dinga ṭawngṭâina

Kai Hla. David ta.

¹ Aw Lalpa, ka ṭawngṭâina hi ngai la, lunginsiet ka hninaa hin na lo sit la, I ringumna le felna leiin mi hung dawn rawh.

² I siehlaw chunga hin rorêl naw la, I mithmua chun mihring hrim hrim thiem chang an um âwm si naw a.

³ Dotu chun ka hringna a suknawmna si a, Ka hringna hi hnuoiah a vuok thlûk a; Thi ta daihai angin hmun inthimtakahai a mîn umtir a.

⁴ Chuleiin, ka thlarau hi ka sûngah a châu a, Ka lungril hi ka sûngah a lunginzîng tah .

⁵ Tienlai nihai chu ka hriet zing hlak a, I thilthaw po pohai chu ka ngaituo hlak a; I kut sinthawhai chu ka sût hlak.

⁶ Ka kuthai hi nanga tieng ka phar hlak a, Ka hringna hi ram châutak angin, nangmaah a dangchâr hlak.

⁷ Aw Lalpa, mi hung dawn vak la, ka thlarau a châu ding a ni hi; Ka kuoma hin i hmai thup naw la, Chuong naw chun khura zu fehai ang elin hung um rawi ka tih.

⁸ Zîngkâr chun i ngilneina thu mîn hriettir la, Nang ka ring si che a; Ka fena ding lampui chu mîn hriettir la; Ka lungril hi i kuomah ka sie tlat hlak si a.

⁹ Aw Lalpa, a mi dotuhaia inthawk chun mi sanhim la, I mi thuphmang dingin i kuomah ka hung tlân a nih.

¹⁰ I dit zâwng thaw mîn chûktir la, ka Pathien i ni si a I thlarau chu a ṭha a nih, ram indiktaka chun mi ṭhuoi rawh.

¹¹ Aw Lalpa, i hming leiin mi sukhar la; I felna leiin ka hringna hi lunginzîngnaa inthawkin ṭhuoi suok rawh.

¹² I ngilneina leiin a mi dotuhai chu sukbohmang la, Ka hringna suklungzîngtu po po sukbohmang la; I siehlaw ka ni si a.