INPÂKNA HLABU 141 - Pathien Lekhabu Inthieng (BSI)

Suola inthawka vênghimna dinga ṭawngṭâina

David Inpâkna Hla.

¹ Lalpa, ka ko che hi, ka kuomah hung vak la, Ka ko chein ka râwlah i nâ lo sit rawh.

² Ka ṭawngṭâina hi thil riminhniktak angin i hmaah suksuokin um sienla, Ka kut phar hi zântienga inthawina angin um raw se.

³ Aw Lalpa, ka bau bula hin vêngtu inhungtir la, Ka hmûr kawtkhâr hi vêng rawh.

⁴ Rîtlona thilhai, Thil suksuol mihai thawpui dingin, Ka lungril hi thil ṭha naw tieng hrim hrima chun inthlêktir naw la, An fâk inhniktak takhai chu mîn fâktir bawk naw rawh.

⁵ Mi fel chun mi vaw raw se, lunginsietna nîng a tih; Mi kâwk raw se, lua hriek nâl ang nîng a tih. Ka luin nuom naw naw raw se, An rîtlonahai leiin ka ṭawngṭai pei ding a ni si a.

⁶ An rorêltuhai chu lungpui sîra peithlâkin um an ta, Anni chun ka thuhai chu ngai tâng an ta, a thlum si a.

⁷ Miin hnuoi ân let a, a suknâwi ang hin, An ruhai hi thlân khoa suknâwiin a um a.

⁸ Aw Lalpa PATHIEN, ka mitin nanga tieng a en si hlak a, Nangmaa chun ka ringna kân nghat hlak; ka hringna hi saruokin mâksan naw rawh.

⁹ Ka âwkna dinga châng an kama inthawk chun mi humhim la, Thil suksuoltuhai chânga inthawk leh.

¹⁰ Keiin ka fe khêl laitakin, Mi rilohai chu anni lênahai chun tlulût raw se.