INPÂKNA HLABU 135 - Pathien Lekhabu Inthieng (BSI)

Lalpa ropuina le milimhai chu hmanglo an nizie

¹ Lalpa chu inpâk ro, Lalpa hming chu inpâk ro; Aw nangni Lalpa siehlawhai, ama chu inpâk ro;

² Lalpa ina ngîr hlak a, Nangni ei Pathien in inhuonna sûng tuollaia ngîr hlakhai.

³ Lalpa chu inpâk ro, Lalpa chu a ṭha si a, A hming inpâkin hla sak ro, ân hawi si a.

⁴ Lalpa chun Jakobhai hi ama ta dingin a thlang si a, Israelhai hi a ro bik dingin a thlang bawk a.

⁵ Lalpa chu ropuitak a nih ti le, Ei Lalpa chu pathien po po nêkin a chunghnung a nih, ti ka hriet si a.

⁶ Lalpa chun a nuom taphawt chu a thaw hlak a, Vânahai, hnuoiahai, tuisuorietahai, tui inthûktak po pohaia khawm.

⁷ Ama chun sûmhai chu kâwlkila inthawkhai chun ân lâwntir hlak a, Kâwlinlep dâm ruo dingin a siem hlak, A sum ina inthawkhai chun thli a lâk suok hlak.

⁸ Ama chun Aigupta rama nau lutîrhai chu a sukhlum a, Mihriem le sahai khawm.

⁹ Aw Aigupta, ama chun inchiknahai le thilmakhai i chungah a hung tir a, Pharao chung le a siehlawhai po po chunga chun.

¹⁰ Ama chun hnam tamtak a sukhlum a, Lal ropuitak takhai a that a.

¹¹ Amor mihai lal Sihon le, Basan ram lal Og le, Kanaana mi po po chu.

¹² An ram chu rochan dingin a pêk a, A mi Israelhai rochan dingin.

¹³ Aw Lalpa, i hming chu kumkhawtluongin um a ta, Aw Lalpa, nangma hriet zingna chu suon um sûng po poin um bawk a tih.

¹⁴ Lalpa, chun a mihai chu ro a rêlpêkin, A siehlawhai chungthua chun a lungril ân lêt ding a ni si a.

¹⁵ Hnam tin milimhai chu tangka le rângkachak an na, Mihriem kutsuok an nih.

¹⁶ Bauhai an nei a, an ṭawng thei si naw a, Mithai an nei a, an hmu thei si naw a;

¹⁷ Nahai an nei a, an hriet thei si naw a, An baua chun thuok hrim hrim a um bawk nawh.

¹⁸ Chuong siemtuhai chu chuong ang bawk chun um an ta, Anih, chuong ringtuhai po chu.

¹⁹ Aw Israel sûnghai, Lalpa chu inpâk ro, Aw Aron sûnghai, Lalpa chu inpâk ro.

²⁰ Aw Levi sûnghai, Lalpa chu inpâk ro, Lalpa ṭituhai, Lalpa chu inpâk ro.

²¹ Lalpa chu Ziona inthawka inpâkin um raw se; Jerusalema um chu. Lalpa chu inpâk ro.