INPÂKNA HLABU 124 - Pathien Lekhabu Inthieng (BSI)

Hmêlmaa inthawka sanhimna leia inpâkna

Kai Hla. David ta.

¹ “Eini tienga ṭhang chu Lalpa ni naw sien chu,” Israelhaiin ti raw se.

² “Mihaiin an mi thaw lai khan, Eini tienga ṭhang chu Lalpa ni naw sienla chu;

³ Kha lai khan anni chun ei hring pumin mi lem tâng an tih, Ei chunga an lung a chawk lai khan:

⁴ Kha lai ngei khan tuihai chun mi chîm tlum tâng an ta, Vadung chun ei hringna hi vurhmang tâng a tih;

⁵ Kha lai ngei khan tui chapo chun ei hringna hi vur hmang tâng a ta,

⁶ Sase anga se dinga an haa mi pe nâwtu, Lalpa chu inpâkin um raw se.

⁷ Châng kamtu chânga vate a suok angin ei hringna hi a suok ta a, Châng chu a se ta a, eini hi ei suok ta hlau a nih.

⁸ Eini mi ṭhangpuina ding chu, Lalpa hnuoi le vân siemtu hmingah a um,” tiin.