INPÂKNA HLABU 115 - Pathien Lekhabu Inthieng (BSI)

Pathien le milimhai

¹ Aw Lalpa, keini mi pe lovin, keini mi pe lovin, I hming chu ropuina pe lem rawh, I ngilneina le i thutak leiin.

² Iengdinga hnam tinin, “Khâwlai am an Pathien kha teh?” an ti am a na?

³ Kan Pathien chu vânah a um si a, A nuom taphawt a thaw a nih.

⁴ An milimhai chu tangka le rângkachak an na, Mihriem kutsuok an nih.

⁵ Bauhai an nei a, an ṭawng thei si nawh, Mithai an nei a, an hmu thei si nawh.

⁶ Nahai an nei a, an hriet thei si nawh, Hnârhai an nei a, rim an hriet thei si nawh.

⁷ Kuthai an nei a, iengkhawm an tâwk thei si nawh. Kehai an nei a, an lâwn thei si naw a, An hnukin an ṭawng thei si nawh.

⁸ Chuong siemtuhai chu chuong ang bawk chun um an ta, Anih, chuong ringtu taphawthai chu.

⁹ Aw Israelhai, Lalpa chu ring ro, Ama chu anni ṭhangpuitu le an phaw a nih.

¹⁰ Aw Aron sûnghai, Lalpa chu ring ro, Ama chu anni ṭhangpuitu le an phaw a nih.

¹¹ Lalpa ṭituhai, Lalpa chu ring ro, Ama chu anni ṭhangpuitu le an phaw a nih.

¹² Lalpa chun a mi hriet zing a, mal mi sâwm a tih, Israel sûnghai chu mal sâwm a ta, Aron sûnghai chu mal sâwm a tih.

¹³ Lalpa ṭituhai chu mal sâwm a ta, A lien a chînin.

¹⁴ Lalpa chun sukpung deu deu raw se cheu, Nangni le in nauhai leh.

¹⁵ Lalpa chun mal sâwm raw se cheu, Ama chu hnuoi le vân siemtu a nih.

¹⁶ Vânhai khi Lalpa vânhai a na, Leihnuoi ruok hi chu mihriem nauhai kuomah a pêk a nih.

¹⁷ Mithihai chun Lalpa chu an inpâk naw a, Hmun retaka zu fehai hrim hrim chun an inpâk bawk nawh.

¹⁸ Eini ruok chun Lalpa chu inpâk tâng ei tih, Tuta inthawka kumkhawtluongin. Lalpa chu inpâk ro.