INPÂKNA HLABU 110 - Pathien Lekhabu Inthieng (BSI)

Lalpa chun laltak kuomah ram a pêk

David Inpâkna Hla.

¹ Lalpa chun ka Lalpa kuomah, “I hmêlmahai i ke innghatnaa ka siem hmakhat chu, Ka changtieng ṭhung rawh,” a ti a.

² Lalpa chun i hrâtna hmawl chu Zion tlânga inthawkin tir suok a tih; Nangin nangma dotuhai laia chun rorêl rawh.

³ I mihai chu i thilthawtheina nia chun mâni nuomthuin an inpêk hlak a, Inthieng mawinaah, zîngkâr phîng sûnga inthawkin, I tleirâwl daidaw chu i nei a.

⁴ Lalpa chun ṭawng ân khâm a, inlêt ta naw nih, “Nang chu Melkizedek um dân anga, Chatuon Thiempu i nih ie,” tiin.

⁵ Lalpa i changtienga um chun, A lunginsen nia chun lalhai sât bawng rem rum a tih.

⁶ Hnam tin lai chun rorêl a ta, Hmunhai chu ruongin suksip a ta, Ram tamtaka chun lu chu sât khawi rem rum a tih.

⁷ Lampuia vadunga tui chu dâwn a ta, Chu lei chun a lu chu dawm sâng a tih.