INPÂKNA HLABU 108 - Pathien Lekhabu Inthieng (BSI)

Hmêlmaa inthawka himna dinga ngênna

Hla, David Inpâkna Hla

¹ Aw Pathien, ka lungril hi adet a nih; Hla sak ka tih, anih, inpâkna hla sak ka tih, ka ropuina ngeiin.

² Perkhuong le ṭingṭanghai, har ro, Kei chu zîngkâr har ka tih.

³ Aw Lalpa, mi tin laiahai chun lâwmthu hril ka ti che a, Hnam tin laia chun nangma inpâkin hla sak ka tih.

⁴ I ngilneina chu vân khûm khawpin a nasa si a, I thutak chun vân dumhai khi a tawng hiel bawk a.

⁵ Aw Pathien, nang chu vân khûm dai khin chawimawiin hung um la, I ropuina chu hnuoi chung po poa hin chawimawiin um bawk raw se.

⁶ I dittakhai hi sanhima an um theina dingin, I kut changtiengin sandam la, mi hung dawn rawh.

⁷ Pathienin a înthiengnaa chun hieng ang hin a hril a, “Hlimtakin, Sekem khuo chu sem ka ta, Sukkoth ruom chu semdar bawk ka tih.

⁸ Gilead chu ka ta a na, Manasse ka ta a na; Ephraim khawm chu ka lu humhimna a na; Judai chu ka lalhmawl a nih.

⁹ Moab chu kân sâwpna bêl a na, Edoma chun ka kekawk pei ka ta, Philistin chu khêk khum ka tih,” tiin.

¹⁰ Khawpui kul neia chun tuin am mi ṭhuoi lût a ta? Edoma chun tuin am mi ṭhuoi a ta?

¹¹ Aw Pathien, nangma ngeiin i mi thlauthlâk a ni naw am a nih? Aw Pathien, kan sipaihai kuoma hlak i suok ve ta si naw a.

¹² A mi dotuhai thaw dingin mi ṭhangpui la, Mihriem ṭhangpuina chu teplo mei mei a ni si a.

¹³ Pathien zârah huoitakin thâwng ei tih, Ama chu a mi dotuhai sir detu ding a ni si a.